Congress sawrkarin a thawhthat te thlir loin an tihsual tlemte a ri ring zawk a, an sawrkar a tla ta niin Congress president Lalsawta chuan a sawi.
-- Advertisement --
Thawhtannia Aizawl Edenthar Venga an party inkhawmah MPCC president chuan 2018 MLA inthlana an sawrkar a tlak chhan kha eng dang vak niloin, kum 10 an sawrkar tawh a, mipuiin an ning tawh a, an tla a ni ber tih a sawi. “Congress sawrkar thawhthat thlir loin kan tihsual tlemte a ri ring zawk a, kan tih that tam zawk a ri zawi tlat. Chu ni lo se sawrkarna siam leh thei kan ni reng. Mahse, Pathian remruatna in kum 2018 khan kan tla ta a ni,” a ti.
Congress party chuan tlawm takin cheng nuai khat sem an intiam a, an sem mai a. MNF party-in SEDP nuai thuma vuak tluk mipui a tiam a, an pawisa chu a vuai pawh ni mai loin a lem a ni tih a sawi. “A tak a awm lo a, inbumna a ni. Mizorama party-te hian mipui hi bum tawh lo ang u. Dawt sawi ching tawh lo ang u,” Lalsawta hian a ti.
MPCC vice president Lal Thanzara pawhin MNF kalphungah veng, khawtlang leh ram tan beisei tur a awm tawh loh zia kan hre tawh tih a sawi a. MNF president-in party dang chuan sum an nei dawn lo, anni chuan tun inthlanah hian sum an ngah dawn, tia a sawi thu sawi chhawngin, Congress party chuan sum hmachhuan tur an nei dawn loa, sum niloin Lalpa Pathian an hmachhuan zawk dawn tih a sawi. “Sum leh pai avanga buai ve lo tur, sum enkawl thiam Pu Lalsawta hoin sawrkar tha siam kan tum,” a ti.
MPCC thuchhuah danin, Edenthar Veng Local Council treasurer Biakmawii leh MNF party member dangten Congress an zawm niin a tarlang.