Mipui tan budget tha a tling – MNYF

Kum 2023-2024 chhunga sum hman tur Mizoram budget, hma taka finance changtu chief minister Pu Zoramthanga’n a pharh thei a ni, tiin mipui tan budget tha a tling takzet nia an hriat thu MNF Thalai chuan an sawi.
MNF Thalai Hqrs thuchhuak chuan 2023-2024 budget, pharh tak chhungah hian Mizoram mipui tana hmasawnna tur thil tam tak tarlan zingah SEDP hnuaia hnathawhna tur cheng vaibelchhe 595 dah te, Health Care Scheme ah cheng vaibelchhe 60 dah te, Samagra Siksha hnuaia thawktu mi 5537 te hlawh leh hamthatna dawn tihsanna tur cheng vbch 52.98 dahbelh te, Mizoram zalenna atana beitu MNF returnee-te hamthatna tur cheng vbch 5 dah a ni te chu lawmawm an tih thu an sawi.

Hei bakah hian Mizo thalai leh zirlaite All India Service leh central service-a an luh tam theihna’na puihna tur sum dah te, college tihhmasawnna tura dah te, district thar leh RD Block hawn thar enkawlna tura dah te, Mizorama tlawmngai pawl hrang hrangten ram leh khawtlang rawngbawl hna an thawhnaa puihna tur bakah Lunglei Municipal Council enkawlna tur dah a nih thu a sawi a bawk.

‘Sawrkar hun hmasa lamah Mizoram budget hi kumtir lamah hma taka pharh theih a ni ngai lo a. Pu Zoramthanga kaihhruai MNF sawrkar a din tirh, 2019- 2020 khan March thlaah pharh niin, hrilen vanglai tak 2021- 2022 chhung khan March-ah pharh a ni bawk a. Heng kum tih lohah chuan MNF sawrkar hian February-ah sawrkar sum hman tur ruahmanna Assembly Session-ah a pharh thei zel hi lawmawm kan ti a. Sum inrelbawlnaah MNF sawrkar hian felfai takin sawrkar a kalpui tih a langchiang hle ah kan ngai,’ MNF Thalai thuchhuah hian a ti.