MNF party leh Pu Laldenga chu miten an dik zia an hrechiang tulh tulh tih MNF treasurer K Vanlalauva chuan a sawi.
-- Advertisement --
Thawhtannia MNF office, Mizo Hnam Runa inkhawmah K Vanlalauva chuan Pu Laldenga anga mi ropui, Pathianin Zofate min pe chu vanneihthlak a tih thu a sawi. “Pathianin Mizote hi hnam, sakhua leh ram min pe a, hemi humhalh tlat duhna leh hmangaihna thinlung Pu Laldenga’n Zofate hnena a tuh hi a ropui takzet. Pu Laldenga anga hnam tana mi ropui, hnam thinlung mipui hnena tuhtu hi hnamdang pawhin neih ve an duh a, duh avanga neih ve ngawt theih erawh a ni lo,” a ti.
India ram mai ni lo, khawvela Mizo hnam min pholangtu chu Pu Laldenga a ni, tiin, thangthar zelte thinlung thleng pawhin hnam thinlung a tuh a. Sawisela ngaihnep tum awm thin mah se, finna a sang tulh tulh a, Pu Laldenga hlutna kan hrechiang chho tulh tulh a; Mizo hnam leh Mizoram a awm chhung chu Pu Laldenga hming a dai tawh dawn lo tih a sawi a ni.
“Mi thenkhatten MNF party leh Pu Laldenga hi lehkhabua ziak meuhin, dawt hmangin chhuahin sawisel mah se, Pu Laldenga dikzia miten an hrechiang tulh tulh a, miten a chanchin an chhiar zau tulh tulh a, mipuiin thudik chhuizau an chak a, thudik an hre zel a ni,” MNF hruaitu hian a ti.