Kangmei chhuak thei laka fimkhur turin a bik takin ram lama ei zawng thinte chu fimkhur turin Home minister Lalchamliana chuan a chah.
-- Advertisement --
Kangmei chhuak thei laka fimkhur inzirtirna, kumtina neih ‘Kangmei Ven Hapta’ chu February 6 atang khan Mizoram pumah hman tan a ni a. A hawnna pui ber Aizawla neih hmanpuitu Home minister Lalchamliana chuan, mei chu mihringte dam khawchhuahna’n tangkai em em mah se, fimkhur loh chuan mihring tana thil pawi thlentu a ni thei, tih leh, mei thunun loh chuan in kang leh ram kang a siam thin tih mipuiin hre thar tura chahin, “Lo neiha eizawngten lo kan vat a, ramngaw a kan kai loh nan meikawng siam a ni thin a, taka meikawng tha sial a nih chuan vah bak a kang lo nge nge thin. Meikawng vil that loh avangin ramngaw tam tak kan chan a, sawrkar danin a phal loh sapel thinten ramsa eitur hnah chawr a awm theih nan’a ram an hal thinte hian ramngaw a tichereu nasa bawk,” a ti.
Rama chawhmeh zawng, chakai chhi leh thildang ti ten hnahthel ro zinga meizial zuk bung tihhlum loha an paih thinte chuan ram a tihkan fo avangin fimkhur lehzual turin a chah a. Ramkang veng tura tha leh ngaihtuahna sengtute chungah lawmthu sawiin, an thahnemngaihna avangin hmun thenkhatah ramkang thelh a ni fo tih Home minister hian a sawi. Ramkang chuan ram a tibua a, tuihna a titlem a, a kum leha lo neih tur a tichhia a, hmun thenkhatah khua kangin channa nasa tak a thleng thin a, thanharh a hun takzet tih a sawi.
Kumina he Hapta thupui – ‘Thapui Thawhin Kangmei I Veng ang u’ tih a nih thu sawiin, “Ram kang hi Forest-a thawk mi 600 chuan an veng seng dawn loa, khawtina mipui kan tan tlan a, ramkang leh in lama kangmei chhuak kan ven theuh a, fimkhurna inzirtir tharin, kan awmna hmun theuhah ramngaw leh in kang thleng lo tura kan mawhphurhna theuh hlen chhuak turin mipui ka sawm a ni,” a ti.
Environment Forest & CC minister TJ Lalnuntluanga chuan NGO hrang hrang, khawtlang, mipui, kohhran thlenga kan thawhhona vangin kangmei do kawngah hma kan sawn zel tih a sawi a. Eizawnnaa kan neih ‘jhum cultivation’ thlakna tur huan nghet neih chu sawrkarin a kalpui mek thu te, Green India Mission hnuaiah agroforestry hmanga huan nghet neitute an pun zel chuan ram kang duai duai thin chu a reh hret hret a beisei thu te a sawi.
# Kum hnih dana tihchhuah thin India State of Forest Report (ISFR) 2021 tarlan danin Mizoram zau zawng atanga chhuta za zela 0.74 chu ngaw dur chhah tha (very dense forest) a ni a, ngaw dur chhah tha lutuk lo (moderately dense) zaa 26.11 a awm a, ram hring chin, forest cover zau zawng chu za zela 84.53 a ni. Ngaw dur chhah tha ho hi humhalh bik – Murlen, Thorang, Zongaw, Phawngpui ang chite an ni.
# Kum hnih kalta, 2019- 2021 chhunga Mizoram puma ram hring (forest cover) hloh zat chu sq. km 185.51 a ni a; open forest khuh chin chu zaa 56.68 a ni. Heti chung hian Mizoram chu India rama ramngaw nei tha ber state a la ni.
# India rama ramngaw hausakna (growing stock) chawhrual chu 56.60 cubic metre per hectare (cum/ha) a nih laiin, Mizorama ramngaw hausakna chu 38.60 cum/ha a ni.
# Forest Survey of India chuan kangmei chhuak report hi a en reng a, an satellite hmangin tuala vawkchaw chhum thlengin an rawn hmu thei. Kum 13 kalta chhung khan Mizoram hian ram kang report a ngah ber char char a. Hetianga kangmei chhuak a ngah chhan hi kumtin lo leh huan la hal vang a ni ber.
# Forest Survey of India-in kangmei chhuahna hmun hluarna bik a chhinchhiah danin Mizoram chhimthlang lam, Chakma Autonomous District Council leh a chhehvel a sang fal hle.
# Ramngaw leh a chhunga cheng nungchate nasa zawka humhalh a nih theih nan kum 2000 khan State Level Fire Prevention Committee leh District Level Committee din niin, an ni hmalakna hian kumtin Kangmei Ven Hapta hi hman thin a ni a, kumin hi a tum 24 na a ni.