Kar tawp fotball hnuhma langsar

Kar tawp khan tualchhung league hrang hrang khelh chhunzawm a ni a, football ah hnuhma thar hmuh belh tur a awm nual. Kar tawp football hnuhma langsar zual kan hrut kual leh ang.
English Premier League
Pathianni zanah Liverpool nen 2-2 a an inhnehtawk tumin Bukayo Saka chuan Arsenal hmahruaina goal a thun. Saka hian EPL-ah goal 50 a thun tling chiah a. Arsenal player zingah EPL a goal 50 thun tling thei 11-na a ni. Arsenal tan EPL a goal 50 thun tling zinga naupang ber a ni nghe nghe. EPL-ah hian kum 24 tlin hmaa goal 50 thun tling thei 16 an awm mek a. Kum 2025-ah kum 24 a tlin dawn chuah vangin hnuhma tha leh zual hnutchhiah belh thei dinhmunah a ding.
Arsenal nen an inkhelh tum hian Mohamed Salah chuan Liverpool si phurh a sut zo lova, an team tlawm tur a chhan him. Salah hian Arsenal lakah goal 11 a thun tawh a, EPL-ah Arsenal laka goal thun hnem pathumna a ni a. A chungah hian Harry Kane (14) leh Wayne Rooney (12) te an awm. Arsenal lakah khan minute 9-na lekah goal an chhuah a. Hei hi Liverpool in season kal mekah chawlhlawk hmaa goal an chhuah hmasak ber tum a ni.
Inrinni zanah Southampton an hneh tumin Erling Haaland chuan Manchester City chakna goal a thum. Haaland hian EPL vawi 75 khel tawhin goal 74 zet a thun a, hnuhma a nei tha hle. Season liam ta tan tirh atanga thun thlengin Haaland hian EPL-ah goal 38 a tun tling tawh a, a hnuai chiahah goal 29 thun tawh Cole Palmer a awm a. Chelsea midfielder pawimawh Palmer hian goal contribution vawi 45 zet a nei thung a.
Pathianni zan khan West Ham United chuan an mikhual Manchester United an hneh. Hammers hian an mualah United hi vawi thum an hneh zawn tawh a. Kum 47 zet hnuah United an hneh zawn rei ber tum a ni a. 1974-77 chhung khan United hi vawi li an lo hneh zawn tawh a ni.
Spanish La Liga
Inrinni zana El Clasico-ah Real Madrid chu an mikhual FC Barcelona lakah 0-4 ngawtin an tlawm a, inelna hrang hrangah khelh 42 chhung tlawm nei lova an kal tluang lai chu an hmelma lian berin an tihtawpsak. Barca lakah 4-0 ngawt an tlawm hi La Liga-ah an muala an tlawm chian pathumna a ni a. FC Barcelona lakah 5-0 ngawta an tlawm hnu khan hetiang em em a tam hian an la tlawm leh lo.
Barcelona lakah an tlawm tum hian Real Madrid forward Kylian Mbappe chu vawi 8 ngawt a off-side a, La Liga-ah season 15 chhung game khata offside ngun ber a nih rual.
An hmelma lian ber Real Madrid an sawp tum hia kum 17 leh ni 105 leka upa Lamine Yamal chuan mawi zetin goal a thun a, Yamal hi El Clasico-a goal thun thei naupang ber a ni. Koppa Trophy dawng hlim hlawl Yamal hi La Lifa-ah Santiago Bernabeu-a goal thun thei naupang ber a ni tel bawk.
Real Madrid lakah hian kum 36 a upa Robert Lewandowski chuan Barca tan goal hnih a thun. Lewandoski hi Santiago Bernabeu-ah goal hnih thun thei upa ber a ni bawk. Lewandoski hian inelna hrang hrangah goal 368 a thun tling tawh a, Jimmy Greaves record khumin Europe’s top 5 leagues-ah goal thun tam pathumna a ni. Poland player ropui Lewandoski hian Real Madrid a ngam viau a, an lakah goal 10 zet a thun tling der tawh a ni.