Kargil indo hriatrengna hmang

July 26 kha Kargil indo champha a ni a, he ni hriatrenga hi kumtin hman thin a nih angin, BJP Mizoram pawhin an office-ah an hmang a. Inkhawm zawhah India tana nun hlan tawhte hriatrenga lungphum – War Memorial Zodin Square-ah zahna pangpar an dah.
BJP State office-a inkhawmah BJP MLA K Hrahmo chuan kum 1999-a Kargil War-a India-in hnehna a chan hriatrengna leh chu indonaa sipai huaisen nunna chante hriatrengna atana hun hman thin a ni tih a sawi a. Kargil indo hunlaia India ram puitu pawimawh tak chu Israel a ni a, Israel-in a puihna avangin Kargil War-ah pawh khan kan chak a tih theih tih sawiin, “Kargil War-ah hian India sipai huaisente chu khawluma piang leh seilian ni mah se, an tawrhchhelna leh an tumruhna leh an huaisenna avangin India chuan hnehna a chang a ni. Kargil War hian India ram chu khawvel hriatah a ropui zia a tarlang a. India hmalakna fing tak avang khan khawvel pawhin India an hmuh dan a dang ta. Kan sipai huaisente kan hriatreng a, India ram venghimtu sipaite zahna kawngah pawh kan thanharh a, kan zah an pawimawh hle a ni,” a ti.
Tunhnai lawka Operation Sindoor atang pawh khan Pakistan tan chuan India beih a sim thlak hle ngeiin a rinawm tih K Hrahmo hian sawiin, “Mizoram pawh India rama kan awm hi kan vannei hle a, lawm nachang kan hriat a ngai. India ram hausakna chhawr ve turin Mizoram mipui kan inbuatsaih a, ngaihtuahna kan sen a ngai a ni,” a ti.