Kashmir khaw vawt a vin tawh hle

Khua tha hle mah se Kashmir phaikuamah chuan thlasik khaw vawt a vin ta hle a, tui khang theihna khawp aia vawt fe a ni tawh tih Ningani khan thuneituten an sawi.
Zan lamah phei chuan khua thiang tha hle mah se phaikuamah hian a vawt thei hle a, chhun lamah pawh ni sain khua a tilum zo rih lo niin Met office-in a sawi.
Kashmir hmar lam, Barring Gulmarg chu phaikuama hmun vawhna lai ber a ni hlawm a, Kashmir hmun dangah pawh a vawt tawh hle bawk.
Pahalgam-ah chuan Nilaini zan khan -10.4°C niin a hma zana -8.2°C aiin a vawt zawk a, phaikuama a vawhna lai ber a ni.
Srinagar-ah pawh -4.4°C niin a hma zana 1°C aiin a vawt zawk niin Met office chuan a sawi.
Gulmarg-ah pawh -9.6°C niin a hma zana -9.8°C aiin a lum hret a, a lumna erawh a chhe hle.
Phaikuam luhna, Qazigund leh Pampore-a Konibal khuaah chuan -6.2°C a ni bawk tih an sawi.
Kashmir hmar lama Kupwara-ah pawh -4.6°C niin chhim lama Kokernag-ah chuan -5.6°C a ni bawk.
Met office chuan ni hnih lo awm leh tur chhungin khua a ro dawn hle a, Inrinni hian hmun thenkhatah ruah tlem emaw, vur emaw a tla thei niin an sawi lawk.
Phaikuamah hian khua pawh a la vawh belh thei niin an sawi a, ni rei vak lo chhung chu khaw vawt hian hmun thenkhat a la tuam na dawn niin an sawi.
Kashmir hian tunah hian thlasik chhunga hun hrehawm lai ber, ‘Chillai-Kalan’ an tih chu an hmang mek a, he hun hi December 21 atanga intan kha a ni a. ‘Chillai-Kalan’ an tih hun chhung, ni 40 chhung hian vur a tla nasa a, khua pawh a vawt zual hle thin a ni.
‘Chillai-Kalan’ hi January 30-ah tawpin ni 20 dang awh, ‘Chillai-Khurd’ (small cold) an la hmabak a, hemi dawtah ni 10 chhung awh, ‘Chillai-Bachha’ (baby cold) an la tuar leh dawn bawk.