Mi paruk thihnaah ngaihdam dil

India-a temple hausa ber, kum tin hunpuia tlawhtu maktaduai tel nei thin chuan an ticket lak tuma intlar innek buaina chhuaka mi paruk an thihnaah ngaihdam a dil.
He thil hi Nilaini zana chhim lam, Andhra Pradesh-a Tirupati temple-a thleng a ni.
Video thehdarhah chuan temple thuneituten counter an siamah ticket inchuha mi sang tel an inhawr khawm chu an innek buai tih a lang.
State sorkar thuneitute chuan he chhiatna thlengah hian a mawhphurtu temple-a thawkte lakah nasa taka chet a nih tur thu an sawi.
Temple truct chairman BR Naidu chuan he innek buaina hi ‘mi tam lutuk vang’ niin a sawi a. “A vanduaithlak tak zet a ni,” tiin Nilaini khan tual chhung chanchinbute hnenah a sawi.
Trust board member Bhanu Prakash Reddy chuan ngaihdam a dil a. “Token sem chhuah nan counter 91 hawn a ni a, vanduaithlak takin innek buaina a chhuak ta a ni,” a ti a. “Hetiang thil hi temple-ah hian a la thleng ngai miah lo va, pawi kan tiin ngaihdam kan dil tak zet a ni,” a ti.
Andhra Pradesh Chief Minister N Chandrababu Naidu pawhin he chhiatna thlenga thi an awm chu pawi a tiin a tawrhpui tak zet tih a sawi a, Ningani tlai khan temple hi a tlawh nghe nghe.
Prime Minister Narendra Modi pawhin ‘na’ a tih thu sawiin state sorkar chu puih a ngaihnaah a puih vek tur thu a sawi.
Tirupati temple hi Hindu hmun thianghlim ber pakhat a ni a. An pathian, Balaji tia an sawi lar, Sri Venkateswara pual temple niin temple hian thil hlu dollar tluklehdingawn tel hu a kawl a, India-a hausa ber a tling.
Kum tin tlawh tum mi maktaduai 24 dawn India leh ram pawn atangin an kal thin.
Ni 10 chhung awh, Vaikuntha Dwara Darshan hman thin niin hetih hun chhunga pathian be tura kalte chuan vanram gate thlen theihna niin an ngai.
Hetih hun chhung hian kum tin mi maktaduai telin an tlawh thin a, a chang phei chuan ni khatah maktaduai hnih/thum lai pawh an tling thin.
Nilaini pawh khan mi sang telin ticket lak an tum a, kût hi January 10-a tan tur a ni.
Counter luhna tur gate hawn a nih chiahin chan loh hlauvin an innawr nghal chiam a, hei hian chhiatna a thlen ta niin thil thleng hmutu chuan Times of India chanchinbu hnenah a sawi a, police pali chauh an awm lai niin a sawi bawk.
Mi thenkhat chuan mipuiin an tam hneh em avangin police tan tihngaihna a awm lo niin an sawi bawk.
Thuneitute chuan hliam tuarte chu sorkar damdawi inah a thlawnin enkawl turin an ti.
India-ah hian sakhaw thila punkhawmnaah hian chhiatna a thleng fo thin a, hmun zimah mi tam tak an awm khawm a, himna a tha tawk lo thin bawk.
Nikum khan mi 120 chuang Uttar Pradesh-a sakhaw thila punkhawmnaah an lo innek hlum tawh bawk.