JC.Zoremi Hmar Joute
-- Advertisement --
Kristiante tana hun ropui ber leh nuam ber, hlimawm ber mai, kum khata vawi khat chauh thleng thin denchhen a, khawpui hmun hrang hrang kan han chei sup sup mai hi kei, lawmawm hi ka’n ti khawp a(h). Mi thenkhatin, “Sum tam tak seng a, khawlai chei vak vak lo hian, mi rethei leh chanhai te, mamawh ngawih ngawihte tanpui nan hmang zawk ila,” ti zawng hian an sawi kan hre fo a. Chutih laiin hetianga sawi chi hi chu artui chhum peka a kan tui ti zawk, a kan peka a chhum tui ti zawk chi an ni deuh.
Thil hi ngaihtuah dan hrang hrang awm se la, tlang hrang leh mual hrang, ruam hrang leh zawl hrang atang te hian thlir ve fo tur a ni. A zangkhai zawnga ka dawngsawng hlauh mai thin hi ka vanneihna niin ka hria. Bible-ah kan hmu a ni lo’m ni kha(h)? Bethani khuaa phar Simona ina Isua a awm laiin, hmeichhe pakhat, alabasta bawma hriak rimtui to tak kengin a lo kal a, Isua chaw kil lai lu-ah a leih a. Zirtir ten an lo ui em em mai a, “Engah nge hetianga a tihboral mai mai ni! Man tam taka hralha mi retheite hnena pek theih a ni asin,” an lo ti a nih kha. (Matthaia 26:6-11) Hei pawh hi dik leh tha zawk angin a lang tho. Mahse Isua chhanna kha a dik. “Hmeichhia hi engah nge in tihbuai ni? Ka chungah hian thil tha tak a ti a ni. Miretheite chu kumkhuaa in hnena awm an ni alawm, kei erawh chu kumkhuaa in hnena awm tur ka ni lo,” a ti a nih kha. Kum khata vawi khat chauh, Isua tana thil tha kan tih a, a piancham lawm nana kawn chei hi thlawp tlang ila, uar deuh deuh zawk teh ang u. Kumkhuaa kan hnena awm reng riangvaite chan tur zawng, a bo dawn chuang lo ve. Lalpa’n a ngaihtuah em em dawn. A theih phei chuan December thla tir lamah hian chei zo vek hman ila, krismas boruak hlimawm tak kan pawt sei ve deuh ang.
Thil thleng hrang hrangah, thlur hnihin ngaihdan leh pawm dan kan nei thin a. A tha lam zawng, a zangkhai zawng leh a êng zawnga thlir chi an awm a, a thim lam zawk leh tha lo lam, ngaihthlak nuam lo zawk zawnga mi thil tih apiang lo dawngsawng a, lo sawi hram thin mihring vanduai an kat ve nuk bawk. Tu emaw bike-in a accident a, “A va zia lo em aw! Kawng a chhia nge a bike a chiang lo em mawni dawn le!” ti chi leh, “A rui a ni lo maw!” ti mai chi an awm. Chawei dawhkan kil laia tute chhungkua emaw rel suah suah chi leh, mi chanchin sawi reng renga a chhe lai lawr zat zat chi an awm laiin, mi tha leh fing fel, mi hlawhtlingte leh entawn tlakte chanchin fate hrilh keuh keuh chi, fate’n vui hmui an put deuh dawn pawha a eng zawnga thlirpui chunga dam diaia hnem thin an awm bawk a.
Nu leh pate hi kan fate hmaa kan titi duh zawng leh, mi chanchin kan sawi duh danah kan fim khur hle ngaiin ka hria. Engkim mai hi chhungkuaah kan zir hmasa tih kan sawi fo tawh kha. Mimal leh pawl te, kohhran leh tlawmngai pawlte dem vak vak mai te, kawng hrang hranga kan thawhpuite fel lohzia sawi pup pup mai te hi a fin loh thlak a, kan fate chin ve atan kan duh lo tur a ni. Nu leh pa thluak uih chawhnu ruih mai fate chu khawiah pawh an hnawk vat mai. =hianho zingah pawh an hriat nalh nalh theih. Phunchiar, tha tih reng reng nei lo, lungawi hlei thei lo an ni duh a, an chhehvela mite tan mai pawh ni lo, anmahni tan pawh a hrisel lo. Khawvel hrehawm paidal theuh theuh, an hrehawm nawn bik dawn; an lainatawm!
Kawn chei sawi tawh ang aw. A hmasa berah chuan, kan in leh lo, kawn zau lai leh a rem rem kan chei mawi chhan hian a phu! A ni tawp mai a ni. Neih ang ang thawh khawm a, neihthinglung mai baka neih balung thlenga khawng dawt dawt, a chhira chhir awn awn khawpa mi inphalte zara kan Lal Isua Krista piancham kan lawm a, enna duhawm ber lo piang a nihna nena inhmeh em em maia kan kawtthler a’n eng sep sep mai te hi, vana kan Pa khian a huain ka ring lo. A thin a rim hauh lovang! Rawn chhukin rawn chei ve dawn phei se chuan a uar hlah hlah viau hian ka ring a ni. Mihringte tana a aia lawmawm awm tawh map lo tur thil a nih miau avangin, kan theihtawp kan chhuah hi a mawi a, a bata kan bat a ni. Amah avanga nasa taka kawn kan chei te, Amah avang thova Balloon pakhat chauh kan târ emaw pawh ni raw sek; a tha vek!
Chutiang zelin, mi inphalte, Pathianin mihringte a hmangaihna vawrtawp lanna a nih hre chiangte chuan mi rethei leh chanhai zawk te, harsa zawkte pawh an pui nangiang a. Riangvaite runah an insulpel zut thin tih pawh kan hria. “Kawn chei nan ka pawisa ka hmang zo vek a, kan pawlin mi harsa tanpuina thawh khawm tur kan tih kha ka nei ve thei lovang,” an tih thawm kan hre ngai lo. “Chaltlang vengin kawn an chei nasa lutuk a, pawisa an nei tawh lo va, chaw an nghei thup mai; an cher tawh hlawm lutuk,” an tih pawh kan hre lo! Veng chhunga mi harsate an tanpui thawm erawh kan hre kum tin. Veng chei mawi zual lawman siamtute hi an ‘rãu’ ka ti. Min chhandamtu piancham lawm nan ber kan insenso loh te’n, tu piancham lawmin nge maw kan inbuatsaih chuan ang le! Phu ve dang an awm reng reng hleinem!
Mi harsa zawkte, kawtlai chu sawi loh, mahni in chhung takngial pawh cheina tur nei ve lo tam takin khua kan fang a, a chhia a chhiain kan in-pose kawisawi ve a, Thlanthla rial den an sawi ang maia chiar nuk nukin, a then kan nui rawih rawih a, kan hlim a ni. Kum za pawh dam dawn ila kan hmuh phak hauh loh tur sap ram an chei mawi ang maia mawi, eng chi hrang hrang hnuaia kan han meng pual paw pawl hiam mai te hi a zia ve riau a, bel meng an sawi ang chauha vun uk uluk, rod tuiek rawng kai rual em em maite thlenga kan hawi paw phek vek mai te, hlim hmel kan han pu vek mai te hi hlu deuh asin; sap kan an ve theih lai awmchhun te pawh a ni hial ta ve ang!
Kawng tinrenga opposition member kumhlun tan chuan, min chhandamtu pianchamah meuh pawh lungawi a har tihna a ni. In ngaihdan kha her rem thin rawh u. In hlim nan, in tu leh fa, in unaute leh in chhungkaw hlim nan khan asin an tih ni! “A sawisel sel thla lak ve phal loh,” ti bur ta se, tute emaw krismas tree chawrche zet bulah thla in la ang a, pial thunin in hnam mawl Lal thut uau ringawt ang a, in hmel that phah chuang miah lo mai tur asin!