Road safety week leh a behbawm

Zoram Drivers’ Union chuan ‘Lirthei Khalh Fimkhurna Hapta’ an hmang mek a. Transport minister chuan ‘road safety’ chu lirthei khaltute tan chauh ni loin, kawngpui hmangtu zawng zawng – driver, passenger leh kea kalte a huam vek, tiin a sawi a. “Sawrkarin infrastructure tha zawk siamin, dan tharte duangin a lekkawh lamah tan la mah se, kawngpui hmangtuten an thlawp si loh chuan, him zawk tura kan hmalakna hian awmzia a nei thui lo thin. Kan thiltih hian keimah chauh ni lo, midang, mi chhungkua thlengin thui tak a nghawng thei..,” tiin a sawi a.
Hmanni lawk khan Bethlehem Veng leh College veng inri-na bawr velah, kawngsira kea kal nu pakhat chu line bus-in a su hlum der mai a; bus driver kha a ‘stroke’ vang nia sawi a ni a, a vanduaithlak takzet a ni.
Kha thil thleng khan fawmkem a ngah hle a. Pakhatnaah chuan, chetsualna thlenna lai kawngpui sirah khan mihring kea kalna footpath a awm lo phawt. Pahnihnaah chuan, vanduaina tawk ta kha, lirthei tlan velin an sut loh nan, kawngsir, ko poh deuh hrulah fimkhur takin a kal. Pathumnaah chuan, bus-in a hrut ta tho. Palinaah chuan, bus khalhtu a stroke phut a, bus thunun ngaihna a awm lo. Kha thil thlengah khan, kawngsirah footpath awm se, kha chetsualnaah khan thihna a thleng kher ang em? tih chu zawhna awm thei a ni.
Kha thil thleng atang khan fimkhur a tulzia a lang chiang hle a tih theih ang. Lirthei leh lirthei insu pawh hi, a pakhat zawk fimkhur hle mah se, a lehlam an fimkhur loh chuan chetsualna a thleng tho. Lirthei khalhtuin a lirthei condition vawng tha hle mah se, ama hriselna a vawn that loh chuan, fimkhur em emte tan vanduaina thlentu a ni leh hlauh thei bawk. Sawrkar lamin fimkhur tura mipui an chah lawm lawm laiin, a lehlamah kea kalte himna tur (footpath etc) a chhawpchhuah that leh si loh chuan, thihna hial thlen phahna a lo ni leh thei tho bawk.
Road safety a nih ang hian, Road hi lirthei leh mihring kea kalte tana him tura siam a pawimawh phawt. Kawng chhia helna lama lirthei insu ta chawrh chawrh te, lirtheiin mihring a han tai/hrut thluk tawp tawp te a awm fo chuan, thu tha tak tak inhrilh hian awmzia a nei pha lo tlat thin. A tua te pawh, sawrkar, lirthei khalhtu, kea kal mihringte leh kawngpui (kawngpui tha) thlengin kan fimkhur tlan a ngai a ni e.