Kawng chhiat lutuk vangin ruling MLA thlavang hauha chet chhuah kan tum – Ramthanmawia, MLA

Aizawl East-I bial Falkland Venga SASCI sum hmanga kawngpui siam tur, ZPM sawrkarin a tih ‘lapse’ avanga chhe taka awm ta chu bialtu MLA Pu Lalthansanga mizia avangin chief minister leh PWD minister-in an hlamchhiah phah nia an hriat thu MLA Ramthanmawia chuan a sawi a. A thlavang hauhin MNF an la che chhuak dawn niin a sawi.
Falkland MNF Group leh MLA Ramthanmawia te hian Falkland Veng chhung paltlang state highway leh vengchhung inkalpawhna (internal road) hrang hrang, MNF sawrkar tawp lama sum an dah vek tawh sawrkar tharin a tih lapse nia an sawi chu Thawhlehni khan an enho a. MNF MLA chuan, Falkland paltlang kawng Mizoram sawrkarin ama puala kawngpui a neih that ber, ATL Road (state highway) chhe lutuk chu pawi a tih thu sawiin, ZPM sawrkar kum thum tling dawn tawhah khuar chhe te te hnawh bak an la siam lo chu Falkland mipui zahlohna a ni tih a sawi.
“Kawng metre 10 vel lek an metal ve pawh, kar khat hnu lekah a phut chhe leh vek a, niminpiah lawka kawng khuar chhe lutuk vanga lirthei intlanchhawk ngai lai, Falkland Local Council office kawt hi lung leh leinawia hnawh a nih vangin kawng siam hma aiin a diak a, tlan a hreawm zawk. Two wheeler tan phei chuan a hlauhawm zawk hial a, hei hi em ni fur laia hman chi kan CM sawi chu,” a ti.
MNF sawrkar laiin hmasawnna tam tak hmuh tur a awm a, Falkland Veng chhung inkalpawhna hrang hrang belhkhawmin kilometre khat dawn vel an siam a, sum pawh vengchhung kawng PCC/RCC siamna a tan cheng nuai 300 chuang kawng siamnan development sum a lut tawh tih Ramthanmawia hian a sawi.
“Falkland East Volleyball Court kawng phei zel kual chhuak tur leh Falkland Thlanmual-II panna diak chhe lutuk thin pawh SASCI 2023- 2024 a dah vek tawh ni a. MLA inthlan MCC puan hnan a nih vangin thawh mai theih a ni ta lo. MCC hlih hnu ah pawh thawk thei mai loin harsatna hrang hrang an siam a, itsikna leh huphurhna avangin kan CM chuan hman theih loh turin a ti lapse lui ta vak a ni. Falkland veng mipui tan chuan a rilru natthlak ngawih ngawih,” a ti.
An thianpa leh helai bialtu Pu Lalthansanga, a MLA pui chu pa tha tak, hotute nawr vak vak chi a ni loa, chu chu hriain CM leh PWD minister-in an hlamchhiah phah a nih hmel niin MNF MLA hian sawiin, “Hetiang kawng chhe lutuk hi min hlui reng a nih chuan, ram tana kan thawhpui helai bialtu MLA leh Falkland ZPM worker-te hreawm ti lutuk thlavang hauhin MNF kan la che chhuak dawn a ni,” a ti.