Kawng siam hnatlang khar
Ni nga an hnatlan hnuah Thawhlehni zan khan Mizoram Tipper Association, Kolasib District te’n Thawhlehni zan khan hnatlang an khar.
June ni 26 atang khan Kawnpui leh Sairang inkar kawng siamin an hnatlang a, an zualpui tak tak chu zovah an inngai.
“Kan la zo lo a, mahse keini zawh rual a ni lo a. A chhe zual lai kan hnawh a ni mai a, kan tlin tawk a ni,” an hruaitute’n an ti.
Kawng chhe zual laiah lung a vawm khawm a, lung hi mahni sum senga an lei, an phurh khawm a ni. Mahse sorkarin Thawhlehni lamah khan cheng nuai 5-in a pui a, hei hian senso engemaw zat a phuhru turah an ngai.
Mahni motor an thawh a, mahse pawlin diesel man an tum. Hnatlangte ei leh in ngaihtuah a ngai bawk. Ni khatah mi 100 chuang an thawk chhuak thin a, a tawp ni-ah phei kha chuan mi 350 velah an inngai. Khamrang YMA te’n ni tin an pui thin bawk.
“Kawng chhia hi a tuartu tak tak kan ni a, tihngaihna dang kan hre lo a ni,” an ti a, kawng a chhiat em avangin an motor a chhe nasa a, motor siam nan an inseng nasa tih an sawi. An sawi danin, kar khatah trip hnih te an la a, trip khata an hlawh aia tam hi chu motor siam nan an hmang thin. “Diesel man a lo to a, motor siam a ngai reng a, kawngah hun kan hmang rei a, kan hna hi kan thawk thei hram hram a ni,” an ti.
Hna a tluan theih nan an hnatlan chhung hian lirthei an dang a, an lirthei dante’n an thlawp a, thu an awih tih an sawi. Buhfai phur lirthei pahnihin thu an hriat sual avangin tlan an tum a, mahse thil awmzia an han inhrilh a, an kir leh mai a, chu bak chu han indan luih ngai emaw a awm lo tih an sawi.
Kawng hi a tha mai dawna an hriat loh thu an sawi a, Mizoram sorkarin NHIDCL an puh a, a mawhphurtu ber pawh an hre phak lo tih an sawi. Sorkar thuneitute nena an inbiakna atanga a lan dan chuan, Mizoram sorkar leh NHIDCL hian sorkar laipui an nawr a ngai ni bera an hriat thu an sawi.
An hnatlan chhunga puitu, sum leh pai thawhtu leh an thuawihtu lirthei khalhtute leh mipuite chunga an lawm thu an sawi a, kawng a that theih nana theihtawp chhuah turin thuneitute an beisei tih an sawi bawk.