Kawtthlerah ruihhlo ngawlvei tei rawlai hmuh tur an tlem ta

Kum 2024 atanga kawng hrang hranga ruihhlo do beihpui a thlak tan laiin Aizawl leh district khawpui dangah ruihhlo ngawlvei vak vel hmuh tur an tam hle a, tunah chuan kawtthler velah ngawlvei hmuh tur an tlem tawh hle niin chief minister Lalduhoma chuan a sawi.
Ningani khan Mizoram hmun hrang hrangah ruihhlo hman sual leh tawlhruk dona Ni – International Day against Drug Abuse & Illicit trafficking pualin hun hman a ni a. A ni tak hi June 26 (Zirtawpni) a ni a, sawrkar chawlh a nih avangin Mizoramah chuan sawn hma a ni.
Aizawla hman hmanpuitu chief minister chuan, kum 2024-a he Ni an hman lai vel kha chuan Aizawl kawtthlerah leh district capital lam chenin ruihhlo ngai, ngawlvei vak vel hmuh tur an tam hle a, an video pawh a viral thin tih a sawi.
Sawrkar, tlawmngai pawl leh kohhranten theihtawp an chhuah a. Supply dan chah tum ngawt loin, demand tihtawp an tum a. Security Coordination Committee an din a, Ruihhlo Do Core Committee an tinung thar a, Operation Jericho an kalpui a. YMA-in kumpuanah Ruihhlo Do puangin Anti-Drugs Squad an kalpui a. Kohhran hrang hrang kohhran huangchhunga sawi tam turin an ngen a. Zirlaiah awareness an kalpui a, media campaign a kal reng bawk tih a sawi a ni.
Ngawlvei enkawlna hmun hrang hrang an thawhpui a, Hulhhliap Short Stay an kalpui tih sawiin, “Hetianga sawrkar, tlawmngai pawl leh kohhranho pheikhai rual taka kan kal avang hian hma kan sawn hle a. tunah chuan kan kawtthler velah ngawlvei tei rawlai hmuh tur an lo tlem ta hle. Chhanchhuahna chang a, nunphung pangngaia kir leh ta pawh tam tak kan nei tawh,” Lalduhoma hian a ti.
Ruihhlo laka himna tha ber chu tih chhin loh a ni, tiin, “I ban phakah awm reng mah se, tichhin suh. I nunna chhuhsak tur chea Setana thlemna hmanrua a ni. Mi tam takin an tichhin a, an inrin hman hmain a bawiah an lut a, an chhungkua a tichhe vek phawt a, thlanmualah a umlut zui thin,” a ti.
Ruihhlo hmanga sumdawngte chu mipuiin enliam lo tura chahin, ruihhlo zuar ru an hria emaw rinhlelh emaw an nei a nih chuan thuneitute hnenah report zel turin a ngen a, an phu tawk hremna hmu ngei se a duh tih chief minister hian a sawi.
Kumin thupui “Persisting Issues, New Challenges, Innovative Responses” tih a nih thu a sawi a. Synthetic drug a lo chhuak a, a thehdarhtu lam criminal group an pung a, technology thar ber ber hmanga ruihhlo thehdarh thu hriat tur a tam zel tih a sawi. Ruihhlo kaihhnawih sualna thar chhuak zel dolet thei tura intuaihriam a ngai tih a sawi a ni.