Kein Tlawng lui zawh chhuak

|halai zingah veng chhung dawr pawh kea kal peih lo an awm laiin tun hnaiah Dawrpui Adventure Club member palite’n kein Tlawng lui an zawh chhuak a, harsatna hrang hrang paltlanga an tum ram an thlenin an hlim hle.
Samuel Lalruatliana, Samuel Lalhmangaihtluanga, Zothanpuia leh C Vanlalhruaia te an ni a, March ni 22 khan Tlawng hnar, Sairep atanga chhuakin April ni 14 khan Bairabi an thleng.
Kawng pangngai ni lo lui dungah an kal a, pum-a chuan a ngaih chang a awm bawk. Mau pumin vawi sarih vel an kal a, mau pum pawh hi an siam chawp a ngai thin. Mau an sat chawp mai a, vawi khat chu mi sah sa an lei.
Kawng an bo fo a, rin lo deuhvin kawng a lo tawp leh tawp thin. Kawng zawng chawpa an sah chawp chang a awm fo.
Kawng a mumal loh bakah ruah a sur avangin kawng a nalin a diak a, an tlu nasa bawk. Thliin a nuai chang a awm a, thlipui leh ruah surin a nuai chang te pawh a awm.
An kawng tir lamah pialtlep leh lengkir a tam a, an kal tan ni-ah phei chuan km 7 vel zet chu mawng tawlhin an kal.
An ei tur an pai a ngai a, buhfai, dailuah, sangha tin te, thawmhnaw, handset leh power bank thlenga pai a ngaih avangin kg 15 te, a chang chuan kg 20 te an ak thin. Ei turin a daih loh chang a awm a, a chang leh an ke a lawng thul, ni hnih emaw chu an chawl. An thlen tawpah riah buk an sual mai thin a, chutiang chuan indap chawp tak meuhin an kal a ni.
Rul an hmu a, zawng pawh an hmu. Lung mawi tak takte an hmu bawk. Sa hniak pawh an hmu a, sapui hniak niin an hria.
‘Kan hlim, kan phur, sava te, zawng te, lung mawi tak tak te, ramhnuaiah thil mawi tak tak kan hmu a, a nuam kan ti,’ an ti.
Hrehawm tam tak tawkin harsatna hrang hrang an hmachhawn a, ‘Kal lo thei reng kan ni a, hrehawm kan insiam chawp a ni deuh ber. Chuti chunga kal chu kan ni a, mahse kan hlimpui,’ an ti a, ‘Thil hrehawm tak tak kan tawng a, mahse nakina kan sawi tam tur chu khang kha a ni ang,’ an ti. Chu chu adventure sport chu a ni. Hrehawm paltlangin an tum ram an thleng a, chu chu an hlimpui.
An rin aiin lui leh a kam vel a lo fai tih an sawi a, tun hnaiah inzirtirna lam a that vang a nih an ring. A hnar lam a fai ang reng an ti a, Sairang vel a fai lo an ti. Sairang vel hi a khaw mite tihbawlhhlawh pawh ni lovin, Aizawl khawpui thli leh bawlhhlawh luang lut a nih thu an sawi.
A theih ang angin lui hi an thian a, an hmuh china bawlhhlawh tam ber chu tui paina bottle ruak a nih thu an sawi.