Kel vulhna khuaah hrileng vangin kel thi

Kel vulh hmanga intodelh tum mekna khua Thinglianah kel leh beram pul hri a leng mek a, kel 157-in an thihpui tawh nia sawi a ni.
Thudawn danin, Serchhip district khuaa kel vulh uar sa Thinglianah kel vulhna hmunpui siam tumin, helai bialtu MLA, AH&Vety minister Er Lalrinawma chuan hma a lakpui a. A MLA fund hmangin kel 92 leina a pek bakah kel tlan tur tuikhuah siamna leh kel vulhna hmun hungna a pe bawk. Hemi hmang hian Silchar ami kel 92 chawkluh a ni a; kumin May 28-ah Thinglian thlenpui a ni. Heta tang hian 86 a thi tawh a, an vulh sa 76 atangin 71 an thi tawh a; kel 168 an vulh zingah 11 chauh an dam tawh.
Minister hmalakna hian Thinglian khuaa kel damlo hi Serchhip district veterinary officer-ten an enkawl a, tuna an enkawl dan chuan awmzia a nei thui lutuk thei loa, an thisen sample phailam laboratory-a enfiah tura an thawnnaah heng kel thi hi PRR ((Peste des Petits Ruminants) kai an ni tih finfiah an ni tawh. He hri hi kel leh beram ten an kai thin leh thihpui thin nia sawi a ni.
Thudawn danin, Silchar atanga kel an lakluh hi an hriselna dinhmun enfiah a ni hran loa, he hri hi an lo pai sa nia rin a ni.