Kenya-ah tui lian leh lei min vangin mi 18 thi awm tawh

Kenya ram hmun hrang hrangah ruah sur nasa vanga tui lian leh lei min vangin mi 18 an thi tawh.
Police-te chuan Pathianni khan ram laili leh khawchhaka Tharaka Nithi, Elgeyo-Marakwet leh Kiambu county-ah lei min a awm tih an sawi a. Heng thil thleng vang hian mi 18 an thi tih an sawi a, khaw awm dan uchuak tak karah fimkhur turin mipui an ngen.
Leimin hian ‘chhungkaw tam tak a tibuai a, in tam tak a chhia a, thil leh hmunhmate pawh nasa takin a tichhia’ tiin police-te chuan an sawi a, lei min leh tui len theihna hmuna chengte chu fimkhur turin an chah.
Mi engzat nge hmun danga insawn tawh tih an la sawi chiang thei lo.
Tual chhung chanchinbute chuan an khawpui ber, Nairobi-a kawngpuite chu tuiin a chim a, car leh kea kalten tui daiin an chet a ngai tih an tar lang.
Khawpui chhunga Makongeni leh Ruai venga sumdawngte chuan Pathianni khan ruah sur kara kawngpui dinhmun chhe lutuk avangin nawrh an huaihawt bawk a, sumdawnna pawh a nghawng hle.
Khawchin thlirtute chuan Zirtawpni khan ruah sur hian tui atanga natna hrik ang chi hriselna atana hlauhawm a tidarh thei tih an sawi a, ram puma thlai leh lo neihna hmunte a tihchhiat a rinawm tih an lo sawi tawh bawk.
Tun hi thla hnih pawh tling lo chhunga tui lian hlauhawm takin Kenya a tihbuai vawi hnihna a ni a. March thla khan Nairobi hmun thenkhatah nasa taka tui lianin mi 37 an thi.
Africa khawchhak lam ram hian March leh May inkar hian ruah an dawng nasa thin a, May thla chawhma lam hi a nasat zual lai ber a ni thin a. Mi thiamte erawh chuan hun rei tak atang tawha mihringte khawsak phung avanga sik leh sa inthlak nasa chu Kenya leh Africa khawchhak ram dangten an tuar nasa zual thei tih an lo sawi tawh.
“Africa khawpui hrang hrangah tui tam lutuk—ruah sur tam lutuk te, a sur loh laia sur lo rei lutuk ang chi ten nghawng na tak a nei a ni,” tiin United Nations Environment Programme (UNEP)-a Disaster Risk Reduction hotu, Fruzsina Straus-a chuan kar hmasa khan a sawi a, ‘khawpuite hi ruah sur dan inthlak tharah hi rang taka an insiam rem a ngai a ni’ niin a sawi.