Kenyans ten thingphun beihpui nei dawn

Kenyan-te chu special holiday pek niin hei hi sorkarin kum 10 chhunga 15 billion thing phun tura hmalakna a kalpui meka 100 million thing an phun phawt theih nana tih a ni.
Environment Minister Soipan Tuya chuan holiday hmang hian Kenyan mi tinte chuan an duh angin hma an la thei ang tiin a sawi bawk.
Kenyan mi tin te chu thing pahnih tal phun tura ngenin thing 100 phun a nih theih nana hmalakna a ni a. Thingphun turin thing tiak 150 million vel chu lak mai theih tura chhawp chhuah a ni bawk.
Sorkar chuan forest agency centres-ah te heng thing tiakte hi lak mai theih turin a chhawp chhuak a. Hei mai bakah hian an mimal ramah theuh thing tiak pahnih tal phun turin a ngen bawk.
President William Ruto chuan hma hruaiin Cabinet minister tin te hmun hrang hrangah governor te nena hma la tura tih an ni bawk.
Thingphunte hi internet app hmangin chhinchhiaha enfiah reng tur a ni bawk a, mimal leh pawl te chu activity tin record tura hman an ni bawk a. Thing phun hming leh phun ni tin te pawh chhinchhiah vek a ni.
Jaza Miti app hmangin thing phun tur te pawh an that duhna hmun tura ngaihah te phun tur bik te pawh siam vek a nih thu environment minster chuan a sawi bawk a.
Mahse Kenyan hmar chhak lamah tuilian tamna hmunah te chuan thing phun a ni dawn lo thung.
Kenyan hian El Nino avanga ruahsur nasa tak tawk mekin mi tam takin nunna chan phah tawhin mi sang tam tak chenna tichhiain leh infrastructure tihchhiat pawh a ngah hle a, hmar lam region chu a tuar nasa ber an ni bawk.
Kenyan mipuite pawhin thing phun lama sorkar hmalakna chu an thlawp hle bawk a, chutih rual chuan hmabak ko tak a awm tho bawk.
Environmentalist Teresa Muthoni chuan sorkar hmalakna chu ‘thil tha a ni’ tia sawiin mahse kalpui dan chu duhthusam tawk lo tiin a sawi thung a.
Hei bakah hian thing chu an to duh thatna hmun azira thlan ngai tiin a sawi bawk. Hei mai bakah hian dan kalha thingkih nasa tak thunun theih loh laia thingphun sorkarin a kalpui chu an sawisel bawk.