Kharge-a’n Manipur buaina chhui phut

Kharge-a’n Manipur buaina chhui phut
Congress chief, Rajya Sabha Leader of Oppositon Mallikarjun Kharge chuan Zirtawpni khan parliament-ah Manipur-a tharum thawhna thleng chhui a phut thu a sawi a, sorkar laipui chu sorkarin policy a neih leh ruahmanna a neih (White Paper) pharh turin a nawr bawk.
Rajya Sabha-a thu a sawinaah Kharge-a chuan Manipur chu kum hnih dawn an buai tawh a, sorkarin a titawp tura hma a lakna a hlawhchham zel tih a sawi.
“Kum hnih chhung Manipur-ah boruak a tang em em a, sorkar hian a hmet mih thei lo va. Mi 260 chuang thi tawhin mi 60,000 chuang baihvaiin an awm a. Chhungkaw tam tak an inthen a, BJP chuan ngawi rengin a en a. Manipur eibar zawnna a chhia a, GST lak khawm a ni lo va, an state hi dinhmun hlauhawm takah an awm a ni,” tiin a sawi.
Manipur chief minister thin, Biren Singh-a khan he thil thleng hi a mawhphurhah lain buaina a chhuah ruala bâng tur kha a ni zawk niin a sawi.
“BJP hi Manipur ni lovin, Prime Minister Narendra Modi chhan turin hna a thawk a. Prime minister hian a la tlawh miah lo va, eng nga Prime Minister Modi-a hian Manipur a la tlawh miah loh chhan? Manipur pum a buai em em laiin Pu Modi-a chu a la kal lo. Chutih laiin ram pawnah vawi tam a zin a, Manipur leilung erawh a rap duh miah lo. Rahul Gandhi-a chuan Manipur tlawhin a tuartute a kawm a. Supreme Court judge-te leh NGO-te pawhin an tlawh a, prime minister a la tel ve lo,” a ti.
Congress chief hian BJP chuan Manipur-a muanna a awmna turin ruahmanna an nei lo niin a sawi.
“Engnge in tih reng, Manipur-ah hian muanna chu thlen ta che u. Prime minister hi inthlan campaign-in a chhuak awl lo va, Manipur erawh a la thleng lo. Muanna a thlen thei lo va, chhui ka phut a, white paper pawh ranw pharh rawh se. Tunge a mawhphurtu ber? Manipur-a thil thleng hi mi zawng zawngin an hria,” a ti.
Kharge-a hian prime minister chu a hma thei ang bera Manipur tlawh tur leh dan leh thupek kenkawhna tluchhia titha turin a phut.
“Prime minister hian a sawi fiah ngei tur a ni. Eng nge a ngawih tlat, eng nge a tlawh loh, eng nga a harsatna? Prime minister hi Manipur tlawh ngei turin ka phut tlat a ni,” a ti.
Rajya Sabha LoP Kharge-a hian Rajya Sabha Chairman, Jagdeep Dhankhar chu Zirtawpni tuka thutkhawm khan Manipur sawihona hun hawng turin a ngen bawk.
Kharge-a’n Manipur chungchang a sawi chhuah hma lawk, Zirtawpni zing dar 03:00 vel khan Union Home Minister Amit Shah-a resolution put luh, Manipur-a President’s Rule puan pawmpui tura ngenna chu Rajya Sabha-ah hian pawm a ni.
Manipur hi Chief Minister Singh a bân hnuah February thla laihawl atangin President’s Rule-ah dah a ni.
Hmarchhak state-a Meitei leh Kuki inkarah buaina hi All Tribal Students’ Union of Manipur (ATSUM)-in May 3, 2023-a kawng an zawh atanga chhuak tawh kha a ni.