Khaw 11 leh office pakhat tan bawlhhlawh paihna lirthei hlan

Khaw 11 leh office pakhat tan
bawlhhlawh paihna lirthei hlan
Swachh Bharat Kosh Trust kaltlanga lei bawlhlawh paih lirthei 12 chu Thawhlehni khan Urban Development & Poverty Alleviation minister K Sapdanga’n a vailiam.
Swachh Bharat Kosh (SBK) Trust chu sawrkar laipuiin kum 2014-ah a din tih UD&PA minister hian sawiin, Swachh Bharat Mission hlawhtlinna tura duan a ni a, he Trust hi company lian leh bank-ten corporate social responsibility kaltlang leh mimal thahnemngaiten faina leh thianghlimna kawnga sum an thawh ve theihna tura tura duan a ni tih a sawi.
SBK Trust hnuaia sum hmuh hi faina leh thianghlimna kawnga hmasawnna atan, bawlhhlawh sawngbawlna hmun mumal leh tha zawk siamna atan, vantlang inthiarna saknan, awareness campaign bakah faina lama thawktute thiamna tih punna tur training leh workshop neihna atan hman thin a ni tih a sawi a ni.
“SBM hmalakna hi sawrkar tihhlawhtlin tur bik a ni mai loa, mitin mawhphurhna a nih zawk zia SBK Trust hian a tarlang a. Faina leh thianghlimna kawnga thawk chhuak kher lo tan pawh a sumfai zawnga an chetchhuah ve theihna a ni a, heng thawhhona avang hian India ramin fai leh thianghlim piahlamah bawlhhlawh sawngbawlna thlengin hma a sawn nasa hle,” K Sapdanga hian a ti.
Swachh Bharat Kosh Trust-a cheng vaibelchhe 1.68 dawn hmangin bawlhhlawh phur lirthei 12 lei niin – Farkawn, Kawrthah, Ngopa, Phullen, W. Phaileng, Saitual, Mamit, Khawzawl, Hnahthial, Lengpui, N.Vanlaiphai leh SSO office Aizawl pek an ni a, registration tih fel sa niin document pawimawh hlan nghal an ni. Heng truck-ah hian PA set (aurinna) leh GPS tracker dah vek a ni.
Garbage truck bakah hian a dawngtu tur khaw 12-a sanitation workers hman turin rain coat 2, gloves pair 14, mask 12, gumboot pair 4, hunter boot pair 2, kekawr 6, cap (lukhum) 2, t-shirt 4 leh kawrlum 2 theuh pek an ni bawk.