Khaw lum karah India electric siam chhuah pung
Khaw lum karah India electric siam chhuah pung
India-in April thlaa electric a siam chhuah chu darkar kgatah kilowatt tluklehdingawn 167.61-ah a tling a, May, 2024 hnua a tam ber a ni a, khua a lum avangin mamawhna sang ber a thlen avangin a pung zual dawn niin Reuters-in ni tin sorkar chhinchhiahna a zirchiannaah a tar lang.
El Nino chak tak a awm tur thu sawi lawk niin hei hian Asia pumah boruak lum leh ro zawk a thlen a rinawm.
Power mamawh san lai ber chu April 25 kha niin 256.1 GW a tling niin Grid‐India chuan a tar lang a, hei hi a san lai ber record thar a ni a, a aia sang zawk pawh a awm rin a la ni a. May leh June thlaa a lum vanglai chuan 270 GW vel a tling thei dawn nia ngaih a ni.
Kum bia chhutin India-a power siam chhuah chu April thla khan 5.3% zetin a pung tih sorkar laipui hnuaia grid regulator Grid‐India chuan a tar lang.
India-ah hian hnam nawn theih power siam chhuahna chu 16.5%-ah a kai a, July, 2025 hnua a tam ber niin tar lan a ni a. Asia chhim lam ram hian April thla khan hman nawn theih power kWh tluklehdingawn 27.58 a siam chhuak a, kum hmasa aiin 22.3% zetin a pung.
India Meteorological Department (IMD) chhinchhiah danin India hmun tam takah April thla khan a lum lai berin 40-45°C inkar a ni.
Lungalhthei hmanga power siam chhuah chu kum hmasa aiin 2.6%-in a pung a, April thla khan kWh tluklehdingawn 121.34 a ni a, December thla hnua a pung chak ber tum niin tar lan a ni.
Hman nawn thei power siam chhuah a pun avangin kum hmasa lama 74.3% atanga April thla khan lungalhthei atanga siam chhuah zawng zawng chu 72.4%-ah a tlahniam a ni.
Tui chakna hmanga siam chhuah chu 11.8%-in a pung a, kWh tluklehdingawn 11.46 a ni tih tar lan a ni.
Hetihlai hian boruakalhthei hmanga power siam chhuah chu April thla khan kum hmasa aiin 33% velin a tlahniam a, hei hi tuialhthei man sang leh Middle East-a buaina avanga a chawk luhna lama harsatna a awm vang a ni.
Heti chung chuan power mamawh hun laia boruakalhthei hmanga siam chhuah hman a sang hle a. Boruakalhthei hmanga siam chhuah hi April thla chawlhkar tawp khan 9.6 GW vel a ni a, thla tir lam kha chuan 2GW vel a ni a, hei hian backup power anga hman a tam tih a tilang a ni.