Bengal leh Assam-ah chiang takin BJP-in hnehna chang ta

Bengal leh Assam-ah chiang takin BJP-in hnehna chang ta
Indian Prime Minister Narendra Modi-a party chuan tun hnaia state pali inthlan pawimawh tak neihna zinga pahnihah hnehna an chang a, a vawi thum nana a pisa a luah mek zahve vel a thlen mekah hnehna ropui tak hi a chang a ni.
Modi-a kaihhruai BJP chu hmarchhak-a Assam-ah term thum chhung a zawnin thuneihna an chang dawn a, West Bengal-ah pawh thuneihna a chang dawn bawk a. State pahnihte hi Bangladesh ramri depa awm ve ve niin thenawm ram atanga pem lut tamna hmun nia sawi niin inthlan campaign-ah pawh thawm nei lian a ni.
India-a state 28 zinga 20 leh union territory pathum zinga pahnihah BJP leh a tangrualpuite chuan rorelna an chang dawn ta a, hei hian an party policy pawimawh tak, uniform civil code hman leh infrastructure siamnaah a tichak thei dawn niin mi thiam leh politic hriate chuan an sawi.
Party hian New Delhi-a an headquarters-ah hnehna an chan lawmna hun an hmang a, Modi-a hian a hming aupui a, party worker-te’n BJP flag an vai a, pangpar an intheh nasa hle bawk.
Modi-a chuan inthlan result chhuakte hian mipuiten mipui rorelna, ‘politic-a chet dan’ leh ngialnghehna an rinzia a tilang a, Iran nena US-Israel indona ang chi buaina karah India chu ‘inpumkhat’ a nihzia a tilang bawk tih a sawi.
“Hetiang inthlan result-te hian… He harsatna (Asia khawthlanga buaina) karah pawh hian India chu inpumkhat takin a ding tih a tilang a, aw pakhatin a thu a, thil tum pakhat… India hmasawn lam pan turin a inrem a ni,” a ti.
Assam-ah hian bial 126 inthlanah BJP-in bial 82 laiin anmahni pawhin sorkar siam thei khawpin an chak a. Congress chuan bial 19 changin Bodoland People’s Front (BPF) leh Asom Gana Parishad (AGP)-in bial 10 ve ve an la a, All India United Democratic Front (AIUDF)-in bial hnih an la ve bawk.
BJP-in ro a la rel ngai lohna, West Bengal-ah Modi-a hi Home Minister Amit Shah leh BJP hruaitu hlun eng emaw zatin kar tam tak chhung campaign beihpui thlakin hnehna an chang ta a. Bangladesh atanga dan lova pem lut an tih leh kum 2011 atanga thuneihna chelh tawh, Chief Minister Mamata Banerjee-i hnuaia tual chhung eibar dinhmun tha lo an tihte chu an auhla ber a ni.
Modi-a hian Thawhtannia an party hmunpuia hun a hmannaah hian state chhunga ‘dan lova lut rute’ lakah ‘action khauh ber’ kalpui a tiam.
West Bengal-ah hian BJP hian bial 294-ah 206 zet an la a, rorel lai, Trinamool Congress (TMC) chuan bial 80 chauh an la phak a. Congress leh CPI (M) chuan bial hnih ve ve an chang bawk.
Electronics leh automobiles hmunpui, chhim lama Tamil Nadu-ah chuan movie star lar tak, politics-a a vawi khatna atana lut, kum hnih kalta party dintu, Joseph Vijay-a chuan rorel lai, DMK party chu a paih thla ve bawk.
Vijay-a hi state chhungah kum naupang deuh zawk lakah a tla na hle a, chu chu a chet thatpui chhan pakhata ngaih a ni.
Vijay-a kaihhruai, Tamilaga Vettri Kazhagam (TVK) chuan bial 234-ah bial 107 an la a, anmahniin sorkarna an siam thei dawn chiah lo va; mahse, bial nga latu, Congress chuan thlawp an tum.
Regional party hlun, rorel lai, DMK chuan bial 59 lain ADMK chuan bial 47 an la bawk a. Pattali Makkal Katchi (PMK)-in bial hnih an chang ve bawk.
Chhim lam tho, Kerala-ah chuan Congress party kaihhruai tangrual pawl chuan rorel lai, Communist Party of India (Marxist) chu an hneh a, seat hmun thuma thena hmun hnih an la.
Kerala-ah hian bial 140 inthlanah Congress chuan bial 63 an la a. CPI (M)-in bial 26 lain Congress kaihhruai, United Democratic Front (UDF)-a tel, Indian Union Muslim League (IUML)-in bial 22 an la a. CPI-in bial riat leh UDF-a tel dang, Kerala Congress (Nationalist)-in bial sarih an bawk.
DMK leh Banerjee-i kaihhruai, TMC party hi Congress kaihhruai eptu pawl tangrual, INDIA-a lungphum pawimawh ber an ni phak a, kum 2024-a inthlanpuiah khan Modi-a chuan party mala sorkar theihna khawp MP a nei zo lo va, regional party-te rinchhanin tangrual sorkar a siam phah.
Tun tum state inthlana an chak lo leh ta si hian kum 2029-ah inthlanpui lo awm leh tura Modi-a kaihhruai BJP an beihna kawngah nasa takin a tichak lo tura ngaih a ni.