Khaw lum leh ram kangin Europe tibuai

Khaw lum leh ram kangin Europe tibuai
Europe chhim lam khaw lum uchuak tak karah hmun tam tak ram a kang mek zel a, mi sang tel insasengin khaw lum lam hi 40°C chung lam a kai hial.
Italy, France, Spain, Portugal leh Balkan ramahte chuan khaw lum lutuk hi hriselna khawih theih a nih avangin inralrinna dar sang ber khawn a ni.
Spain-a weather service Aemet chuan khaw lum lam hian Seville leh Cordoba-ah chuan 44°C a kai thei dawn nia sawiin Portugal chhim lama thuneitute pawhin hetiang vel hi a ni dawn tih an sawi.
Italy-ah chuan Thawhtanni khan khaw lum vang hian naupang a thi a. Spain khawpui, Madrid hmar lam Tres Cantos-ah chuan damdawi inah kang hliam enkawl lai a thi bawk tih thuneituten an sawi.
Tres Cantos-a cheng mi thahnem tak chu ram kang avangin an insawn chhuak a, regional environment minister chuan ram kang chu ‘thli ro leh chak tak, darkar khata km 70 chuang chak’ vanga thleng niin a sawi.
Spanish Prime Minister Pedro Sanchez chuan ram kang hi chhum lo chat lovin thawktuten thelh tumin an bei tih Thawhlehni khan X-ah a tar lang a. “Ramngaw kang mai thei dinhmunah kan ding reng a, inrin a ngai,” a ti bawk.
Spain hmar thlanga Castile & Leon region-ah chuan hmun 30 chuangah kangmei chhuakin mi 4,000 dawn an insaseng a. Kang pakhat hi Unesco World Heritage site, hman lai rangkachak laih chhuahna hmun, Las Medulas tichhe mai thei dinhmunah a ding mek.
A bul mai, Andalusia region chhim lama khualzinte tamna, Tarifa-a khualbuk leh ina awm mi 2,000 vel an insasang tawh bawk.
Spain-ah hian sipai 1,000 dawnin kang thelh hna hi an thawhpui mek.
An thenawm, Portugal-ah chuan thelhtuten hmun thuma nasa taka ram kang an bei mek a, an nasa ber, an ram lailia Trancoso bula mi erawh Thawhlehni atang khan an thunun thei tan.
Kang thelhtu 1,300 chuang leh thlawhna 14 tirh niin Morocco chuan Portuguese water bomber-te a chhiat avangin thlawhna pahnih an thawn niin Reuters chuan a tar lang a. Thuneitute chuan chhim lam region-ahte chuan khaw lumin 44°C a kai dawn niin an sawi.
Italy-ah Thawhtanni khan khaw lumin 40°C kaiin kartawp thleng lum tura hmuh lawk a ni a. Rome, Milan leh Florence telin khawpui 16-ah inralrinna tihchhuah a ni.
Thawhlehni khan France hmun lia thena hmun thum dawnah khaw lum tur avanga inralrinna puan a ni a, Paris velah 36°C leh Rhône Valley-ah 40°C kai thei tura sawi lawk a ni.
Greece-ah khualzinte tlawh nasat thliarkar, Zakynthos leh Cephalonia-a ram kang chu thli thaw nasain a chhem alh zual a, khua leh khualbukte chhuahsan a ni a. Khawthlang lama Vonitsa khuaah pawh a bul hnai ram kang chu chenna in tan a hlauhawm tawh hle bawk.
Turkey hmarthlanga Canakkale province-ah ram kang nasa tak avangin mi tam takin an in an chhuahsan a. Canakkale Governor Omer Toraman-a chuan Thawhlehni khan thlawhna pasarih leh helicopter paruk nen a thelh hna an thawk tih X-ah a tar lang.
Aegean Sea leh Sea of Marmara inkalpawhna lawng kawng, Dardanelles Strait chu tui phur thlawhnaten tui an chawi nan khar a ni tih a sawi bawk.
Albania-ah pawh ram kang avangin mi eng emaw zat an tlanchhia a, Croatia-ah pawh Split-ah nasa taka kangin Thawhlehni atang khan an thunun tan a. Montenegro khawpui bul, Podgorica khuaa ram kang nasa takin chenna in a tichhe nual bawk.
UK-ah chuan kumina khaw lum thawh lina thlengin England pumah amber leh yellow heat health alert tihchhuah niin 34°C kai thei tura sawi lawk a ni.
Scientist-te chuan khawvel pum lumin Mediterranean nipui chu a tilumin tiro zual a kangmei chhuah duh hun pawh a rei zawk niin an sawi.