Khawhai an champion

Mizoram Volleyball Association (MVA) buatsaih JJS Trucking Bharatbenz Inter Village Volleyball Tournament 2023 chu Inrinni khan final khelh a ni a. Mipa lamah Khawhai an champion a, hmeichhe lamah Kolasib Diakkawn an champion nawn leh bawk.
Mipa final-ah inelna lian Inter Branch YMA Volleyball tournament 2022 final-a inhmachhawn Khawhai leh Hunthar an intum nawn leh a, beisei lawk ang ngeiin inkhel hmuhnawm an lantir nawn leh. Final hmuhnawm takah Khawhai chuan kum hmasa lamah an hneh loh Hunthar an hneh a, Mizoram champion an ni ta nge nge.
R. Dengthuama Indoor, Mualpuia final-ah hian Volleyball thiam veng Hunthar in bul an tan tha a, awlsam takin set khatna an la. Set khatnaah an khingpuite khan lo viau mah se set hnihnaah Khawhai an insiamtha a, harsatna lian tawk lovin set an la. Set khat ve ve an lak hnuin Khawhai an khel tha chhunzawm a, awlsam takin set thumna an la zui leh a, champion turin set khat lak belh chiah an mamawh tawh. Hnufual zawk an nih hnuin Hunthar in tan an khawh thar a, set lina tir lamah hma an hmahruai fal a, point lia hmahruai fal changte an nei hman. Set an la ve leh ngei tura ngaih a nih laiin Khawhai in pui zetin an bei let a, an khingpuite an lehthal a, set la nawn lehin 12-25, 25-15, 25-13, 25-21 in hnehna an chang a, ropui takin an champion zui ta a ni.
Khawhai champion nana thawhhlawk tak Lalhmunmawia chu ‘Best Spiker’ ah thlan a ni a. Lalhmunmawia tan ball tha tak chhawpsak thintu H. Lalramdinmawia chu ‘Best Setter’ ah thlan a ni bawk.
Final ngaihven hlawhah Khawhai leh Hunthar an inkhelh hma tlai dar 4:00-ah hmeichhe final khelh a ni a. Champion lai Kolasib Diakkawn chuan an khingpui Thenzawl East chu set khat hloh chungin an hneh a, Mizoram huap inelna lianah an champion nawn leh. An champion nawn leh theih nana thawhhlawk Lalmuanpuii chu ‘Best Spiker’ ah thlan a ni a. Lalrinzuali, Kolasib Diakkawn chu ‘Best Setter’ ah thlan a ni bawk.