Team lian tlawm zanah Arsenal an chak

Inrinni zan khan English Premier League 2023- 24 khelh chhunzawm a ni a, team lian pathum; Manchester City, Manchester United leh Liverpool te an tlawm. Team lian pathum an tlawm laiin Arsenal leh Tottenham ten hnehna an chang ve thung.
Wolves 2-1 Manchester City
Champion lai leh season kal mekah EPL club zinga chak vek awmchhun Manchester City chu 16-naa awm mek Wolves hmachhawn turin Molineux Stadium-ah an leng lut a. Mikhual an nihna hmunah rin loh takin an tlawm teh tlat a, season kal mekah a vawi khat nan ngam loh tawngin, point an hlawhchhuak zo lo.
Wolves hian an mualah bul an tan tha a, beisei loh takin goal thun hmasa zawkah an tang teh tlat. Minute 13-na lekah City defender Rúben Dias chuan an lamah a ti-goal palh a, mualneitu hmahruaina goal a thunsak. Dias goal thun hi sut tumin tan khawh zui chiam mah se City hian chawlhlawk hmain goal an thun thei lova, si khat faia hnufual chungin chawlhlawk an hmang.
Second half-a City in bul an tan tha a, goal an thun thuai. Minute 58-naah Julián Álvarez chual goal thunin an si phurh a sut. An si phurh an sut hnuin chak ngei tumin an khingpuite an hmachhawn zui naa goal an chhuah belh leh ta tlat thung. Minute 66-naah Hwang Hee-Chan chuan Matheus Cunha siamsak atangin hma an hruai nawn lehna goal a thun. An goal neih chhun venghim turin thapui an thawhzui chiam a, an hlawhtling ta nge nge. Hun tawp thlenga goal dang a luh belh theih loh vangin Wolves chuan inlehthalna lian an thlentir a, champion lai Manchester City chu 2-1 a hnehin, point thum thu tak an hmu.
Wolves lakah tlawm mah se City hian khelh sarih atanga point 18 hmuin hma an hruai chhunzawm zel thung a. An hnuaia awm Tottenham leh Arsenal nen an inkarah point khat a tla zep mek. An muala hnehna hlu tak chang Wolves hi 16-na atangin 13-naah an inhlangkai ve thung.
An tlawm danah Liverpool lawm lo
Season kal mekah tlawm nei lova kal tluang pahnih Tottenham Hotspurs te chu Tottenham mualah an inhmachhawn a, inkhel hmuhnawm takah mualneitu Spurs in 2-1 in hnehna an chang. Player pakua nen chauha a tawp khar Liverpool hi an goal thun hnawlsak an nih dan leh red card pahnih ngawt an hmuh vangin an lawm lo hle.
Team lian pahnih inkhel, inkhel hmuhnawm takah hian Liverpool an in bul an tan tha lova, minute 26-na lekah Curtis Jones hnawhchhuah a ni a, tlem zawk an ni thuai. Kim lo zawk ni mah se an khel tha zui viau a, an khingpuite an chhaih buai fo tho thung. An mualah tam zawk ni chunga inlan Tottenham hian fuh takin an mikhualte an nnawr tlang a, captain Son Hueng-min chuan Richarlison siamsak tha tak chu minute 36-naah awlsam takin a pet goal a, hmahruaina goal a thun.
Tlem zawk ni chungin si phur mah se Reds an hnual lova, an zam hek lo, na takin an khingpuite an nawr zui nghal zat a. Chawlhlawk dawn hnaih minute 45+4-ah Cody Gakpo chuan goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal thun hmasa zawkah an tang. Luis Diaz chuan hma an hruai letna goal a thun. Diaz goal thun hi offside-ah ngaih a nih vangin VAR rawn a ni a. VAR enkawltu lam ten offside a ni lo tih pawm bawk mah se referee nen an inbiakna kalsual vangin offside-ah pawm a ni a, hnawlsak an ni. Inkhel zawh hnuah Diaz goal thun hi pawm tur a nih thu sawi a ni naa result a thlak danglam thei tawh lo thung. An goal thun hnawlsak an nih hnuin an forward Diogo Jota chu minute Diogo Jota69-naah hnawhchhuah a ni ve leh a, Reds dinhmun a chhe leh zual.
Pahnih ngawtin tlem zawk mah se Reds an tang thei viau a, Tottenham lakah point an hmu ngei tura ngaih a ni hman. Tlawm pumpelh tura ngaih an nih tawh laiin an vanduai leh tlat thung a, hun tawp dawn hnaih minute 90+6-ah defender Joël Matip chuan an lamah a ti-goal palh hlauh a, Tottenham lakah 2-1 in an tlawm phah ta a ni.
United an chak lo leh
Manchester United chuan Carabao Cup lamah si thum faia an sawp hnu lawk Crystal Palace chu Old Trafford-ah an mikhual nawn leh a. Thawhleh zana si thum faia an sawp Palace lakah si khat faiin an tlawm a. Old Trafford-a EPL an khelh hnuhnung pahnihah an tlawm zawn teh tlat.
Old Trafford-a lenglut Crystal Palace tan hian minute 25-naah Joachim Andersen chuan mawi zetin free kick a chhuih goal. Minute 25-naa an goal chhuah hi team lian United hian hun tawp thlengin an sut thei lova, an mualah uiawm takin an tlawm. An mualah ngei an tlawm leh tak vangin United hian khelh sarih atangin point 9 chauh an la hmu a, 10-na daiah an tlahniam hial tawh.
Arsenal an chak nuamsa
An elpui team lian pathum ngawt an tlawm laiin Arsenal chuan nuamsa takin hnehna an chang ve thung a. Vitality Stadium-a an khingpui AFC Bournemouth chu si li fai ngawtin an sawp.
Arsenal hian Mimualah an khel tha viau a, minute 17-na lekah Bukayo Saka chuan hmahruaina goal a thun nghal. Minute 17-naa goal an thun hnu hian minute 44-naah penalty an hmu zui leh. He penalty hi captain Martin Ødegaard chuan a pet goal a, si hnih faia hmahruai chungin chawlhlawk an hmang.
Chawlhlawk hnu lamah Gunners an khel tha chhunzawm a, minute 53-naah penalty an hmu nawn leh. He penalty hi Chelsea atanga an lak Kai Havertz chuan a pet goal a, a club thar tan EPL-a a goal hmasa ber a thun. Havertz goal thun hnu hian hun tawp dawn hnaih minute 90+3-ah Ben White chuan an goal lina a thun zui leh a. Si li faia an khingpuite sawpin, point thum an hmu zui ta a ni