Khawlaiah Ukrainian speaker hlui kap hlum

Ukrainian parliament-a speaker pawh lo ni tawh, Andriy Parubiy-a chu Inrinni khan an ram khawthlang lama Lviv-ah kah hlum a ni tih thuneituten an sawi.
Video thehdarh pakhat chuan khawlaiah Parubiy-a hi mi pakhatin a hnung lamah zuiin a kap a, a tlanchhe zui tih a lang a, man tuma zawn mek a ni.
Ukrainian President Volodymyr Zelensky-a chuan ‘tualthahna rawng tak’ tia sawiin Parubiy-a chhungte a tawrhpui thu a sawi.
Kum 54 mi, Parubiy-a hi kum 2014-a Ukraine-a Euromaidan mass protests an tih, an ramin EU zawm leh Russian lam awntu, president hlui ni ta, Viktor Yanukovych-a duh lohna lantira hriat hlawh a ni.
Thuneitute chuan codename-a Siren an tih beihpui thlakna bul tan nghalin a kaptu man tumin an bei nghal a. “A tul ang apiang pek zel an ni ang,” tiin Zelensky-a chuan thu a chhuah.
Ukraine-a prosecutor-te chuan ‘mi tu tih hriat lohvin vawi tam tak a kap’ tia sawiin a hmunah Parubiy-a hi ‘a thi’ an t.
Inrinni zana thuthar lakhawmtute a kawmnaah Lviv police chief Oleksandr Shliakhovskyi chuan ‘vawi riat chuang kah a ni a, a kaptu hi hriat a la ni lo’ tih a sawi ve bawk a. A lan danah ‘uluk taka ruahman lawk’ niin a sawi bawk.
Lviv-a chief prosecutor Mykola Meret-a chuan Russian an inrawlh em tih nen a chhan tur hrang hrang an chhui nghal tih a sawi.
A kaptu hi delivery company Glovo-a thawk angin a inthuam a. Video-ah pawh hian delivery bag eng a keng niin a lang a. e-bike a nei bawk nia hriat a ni.
Parubiy-a hi Yanukovych-a sorkarin kum 2013-a EU zawmna tur a ziah duh loh hnuah khan Euromaidan movement-ah a phusa ber pawl a ni zui.
Maidan-a mahni inveng pawl, ralthuam kenga Kyiv khawpui lailia puan ina awmte vengtu a din a, a kaihruai bawk a. Hetih hun lai hian Ukrainian riot police-te nena an innawrnaah hliam pawh a tuar nual.
Yanukovych-a paih thlak a nih hnuah Russia-a inlak hran tum pawlte nen Ukraine-a an inbeih tan lai vel khan National Security & Defence Council-ah secretary a ni a, Russian President Vladimir Putin-a’n chhim lama Crimea peninsula a luah tan lai a ni bawk.
Russia-in kum 2022-a Ukraine a rûn tan lai khan territorial defence a zawm a. Tunah hian parliament member a la ni mek bawk.