Khawpui fai lawmman sem

Kum 2017 atanga Urban Development & Poverty Alleviation department buatsaih, 2023 October 9 atanga November 30 chhunga neih Mizoram Khawpui Fai Inelna 2023 lawmman chu Zirtawpni khan Swachhata Symposium 2024 neih rualin sem a ni a. UD&PA minister K Sapdanga’n a hmanpui.
Mizoram khawpui fai inelnaah hian Mizorama notified towns 28-te faina leh thianghlimna kawngah an inel a, kumin hian khawpuite category-1A-ah Aizawl Municipal huamchhunga local council 85 inelin, category 1B-ah Lunglei Municipal huamchhunga local council 24 an inel. Lawmman hian sumfai bakah certificate a kengtel theuh a ni.
Category-2 (district headquarters) ah Aizawl leh Lunglei tiam lohin district headquarters 9 inelin, category-3 (urban towns) ah khaw 17 an inel bawk.
Khawpui fai enelna hi Ministry of Housing & Urban Affairs-in kumtina a buatsaih thin, India ram khawpui fai endikna – Swachh Survekshan atana Mizoram khawpui inbuatsaih lawk theihna atana tih a ni a, Swachh Survekshan-ah hian Mizorama khawpuite pawhin lawmman 13 an dawng tawh a ni.
Khawpui fai lawmman sem rual hian Swachhata Symposium neih a ni a. District leh Mizoram khawpui hrang hranga sawkar mi pawimawh telin, mithiam sawm bikten bawlhhlawh sawngbawl dan tha zawk leh bawlhhlawh tuiril sawngbawl dan tur an zirtir a; faina leh thianghlimna bakah ram hmasawnna tura bawlhhlawh sawngbawl kawnga hmachhawpte thlira sawiho a ni.

Fai inelnaa lawmman late:
Category-IA (AMC huamchin local council):
1-na Republic Vengthlang LC (Rs. 100000)
2-na Laipuitlang LC (Rs. 80000)
3-na Thakthing Veng LC (Rs. 60000)
Consolation dawngtu : Chaltlang LC, Salem Veng LC, Tanhril LC, Luangmual LC, Mission Vengthlang LC (Rs. 20000 theuh)
Category-II (district hqrs):
1-na Serchhip (Rs. 300000)
2-na Khawzawl (Rs. 200000)
3-na Siaha (Rs. 100000)
Category-III (other urban towns):
1-na Biate (Rs. 300000)
2-na Phullen (Rs. 200000)
3-na Ngopa (Rs. 100000)
Special Award:
Fastest Mover Urban Town: Lengpui (Rs. 50000)