Khawpui fai Lunglei lawmpuina leh fuihna

K. Hmingthankaia
Ministry of Housing & Urban Affair buatsaih India rama khawpui fai inelna, Swachh Survekshan Award 2024-2025 semna tunhnaia Delhi-a neihah khan, Mizoram khawpuite zinga faina lama hma hun nei eng ber, Promising Swachh Shehar Award lawmman chu Lungleiin a dawng a ni. India ram pum huap tana lawmman 78 siam zinga pakhat Lungleiin a dawng hi a lawmawm em em a, a hma pawhin faina lam bawk, Swachh Survekshan Award paruk ngawt a lo dawng tawh a ni. India ram khawpui fai ber lawmman chu Madhya Pradesh-a Indore-in a vawi riat nan a dawng leh ta a ni. Lunglei ka lawmpui che u a, tha thlah lova tang zel turin ka duhsak bawk a che u.
Lunglei hi heti khawpa khawpui pawimawh leh lian ni hmasa si hi, mipui tam em em zawng leh tawt lutuk zawnga a thang pur pur lo hi a vanneihthlak hle mai. Chuvangin, Lunglei tan hian nakin hma hun atan hmasawnna ruahmanna fel leh fai leh dik hi duhthala siam theihna hun tha a la awm a ni. Tun atangin engkimah nakin hun tur thlir thiam pha turin tute pawhin rilru lo seng rawh u. Tute mah mahni hmasial em em leh duham em emin khawsa lo ula. Nakin zela Lunglei khawpui mawi nan, nawm nan leh, keimahni leh kan tu leh fate tan mai bakah, Mizoram timawitu, tinuamtu ni thei turin tunah khan hun remchang a la awm a ni. Chutiang rilru chu tun atanga in put chhoh ngat chuan, in tu leh faten rilru hrisel an rawn pu ve zel ang.
Tuna Aizawl awm dan ang, vantlang hmun awl zau ve deuh leh thawl thawveng ve deuh tur apiang chu, NGO eng pawl pawl emaw leh khawtlang hruaitute leh sawrkarin, eng eng in emaw sak nan huamhauh taka an inchuh zo zel ang hi ti ve miah suh u. Nakina thut khawmuan hawi thawven nante, kawng zauh nante, motor inpelh nante, bungraw hlanthlak lawk nante a tul tih hre reng ang che u. Rem leh rem lova mimal in sak phei chu phal reng reng suh u. Tunhmaa Tennis Court thin hmuna Police Station sak an tum in phal lo te kha a tha lutuk. Aizawl hi engkimah awt suh u. Aizawl chu a tha lo lai leh tawp hnawk lai zel hi entawnin, rilru fim tak puin, inzir fin nan hmang hlauh ula, ti ve duh miah suh u. Engkimah rilru hrisel tak pu chungin neitu rilru pu tlat ang che u. |hat tlanna tur chuan eng kima neitu rilru put hi a pawimawh ber tih lo hre reng ang che u.
Ka fanu hnathawk rei lo te ka rawn awmpui chhung pawh khan eng eng emawah chuan ngaihtuahna ka seng ve thin a. Bazar Veng pheia motor dah dan leh kal vel dana ka ngaimawh leh rawtnate pawh, ka awm chhunga SP pahnih rawn awm hmante kha an Office-ah ka sawipui ve ve bakah, ziakin ka pe ve ve bawk a, hma an la ta em ka hre lo.
Aizawlah chuan Aizawl faina turte, mawina turte, nawmna turte, thawvenna turte leh khawsak ho nawmna tur reng reng hi, dan kenkawh ngam loh vangte, dan zawm duh loh vangte, pawisak nei lo, zaktheilo, mahni hmasial em em leh duham lutukte vang leh, neitu rilru pu ve miah lo pemkhawm tam lutuk avangte hian engmah tih theih tak tak a ni tawh si lova. Rilru dik leh hrisel nei, neitu rilru pute thinlung leh mitthlaa tih theih vek si hi, khitiang mite vang khian engmah a tih that theih tak tak tawh lova, nitin kan chhiat belh zela, kan balh tawp belh zel a nih tak hi. Mi dik leh neitu rilru pute rilru hi a na thin asin. Engmah siamthat theih tak tak tawh si lo hian eng eng emaw ruahmanna leh dan thar, thupekte an han siam leh ngawt thina, a thu petuin bawhzui hek suh, a zawm turin zawm hek suh, pawisa inchuh chiahin kan phu ta luai luai mai a nih hi.
Aizawl hi thikin er lo ula, awt hek suh u. Khawi ram pawhin sawrkar hmunpui khawpui a neih a ngaia, khawi state pawhin sawrkar hmunpui khawpui a neih a ngai a ni. Mahse, chu’ng khawpuite chu an nuam berin, chenna atana awhawm ber an ni kher lo tih hriat a tha. Aizawl neih ang leh nih ang nih tum ve zel kher suh u. Aizawl anga tawphnawk lama headquater nihte, milem leh a dera nung thiamte hqtr. duham leh hmasial lama hqtr. neitu rilru pu lo pemkhawm hqtr. rilru hrisellote hqtr. Aid, addict leh KS hqtr. nih ve kher tum lo ula. Boruak nuam leh thawveng, chenhona nuam, khaw fai, mawi leh thianghlim, rilru hriselte tuallenna Lunglei Sub- headquater nih mai hi a tha zawk daih.
AMC thika Lunglei Municipal Council in ngiatte kha kei chuan tul ka lo ti lem lova. Hman deuha in MLA chhuanvawrin, ‘Municipal hi kan la tlin lo deuh a ni’ a tih te kha dik ka lo ti a, nangni erawh chuan in haw deuh a nih kha. Mahse, LMC in nih tak rau rauah chuan, AMC anga pawisa hmuhna tur ringawt buaipui lovin, nakin zela Lunglei khawpui faina, nawmna, thianghlimna, mawina leh thawvenna tur lam chauh bakah, ran khuahkhirh leh khawsak ho nawmna tur lam zel chauh ngaihtuah thin sela. Tin, Lungleia pem lut tur hi strict hle ang che u. LMC chuan Lunglei thatna tura dan leh kaihhruaina a siam reng reng a takin, huai tak leh rual takin umzuiin kengkawh nghal zel rawh se.
Tuna hun tha in neih laia LMC leh mi tinin rilru hrisel tak pu chunga mahni hmazawn theuha neitu rilru dik tak pua in tih zel chuan, tuna India sawrkarin, ‘Hma hun eng tak nei’ a tih ang ngei che u hian, in eng chho zel ang a, chenna atana awhawm, Mizoram timawitu, Mizoram tinuamtu, India ram timawitu, khawvel mite tlawh chak khawpui Lunglei in la ni thei e.