Khawpui tiralkheltu tang tlanchhuak man

Siaha District Jail atanga tlanchhuak, a hnua Aizawla police kut atanga tlanchhuak leh nia sawi Vanrampana (24), Meisatla Siaha chu Thawhtanni khan Aizawlah man a ni.
Thudawn danin, kumin September 9 khan Vanrampana @ Sanjoy hi Siaha District Jail atangin a tlanchhuak a; a tlanchhuah lai hi jail bang tha lo siamthat mek laiah niin, jail duty-ten an man hneh lo nia sawi a ni.
Siaha District Jail superintendent chuan Siaha Police Station-ah FIR a thehlut zui a, police-in an zawn mek laiin, September 15 khan Central Jail Aizawla tang mi pakhat kan tur chu jail duty-ten ringhlelin an la hrang a, Siaha District Jail atanga tlanchuak Vanrampana a ni tih hriatchhuah a ni. Central Jail hotute hian Zonuam Police Station kutah hlanin, an ni hian Siaha Police hnena hlanchhawng tur an ni.
Zonuam P/S thlenpui a nih lai hian a tlanchhuak leh nia sawi a ni a. Zawn a nih mek laiin September 17 – Pathianni khan Kanan Veng Aizawla in pakhat rawk a, mobile phone leh scooty (taxi) ruchhuaktu chu CCTV atangin Vanrampana bawk hi a ni tih hriat a ni.
Scooty a rukchhuah hi mi hnenah Rs. 1500-in a dahkham a, a a dahkhamna hian ringhlel leh siin scooty hi Vaivakawn Police Station-ah an hlan a ni. Police leh khawtlang hruaitu lamin ngawrh takin an chhuizui a, Pathianni zan hian Dawrpui Vengthar/ Dinthar chhehvelah umzui zel niin, Thawhtanni chawhma dar 11.00 vel khan Vaivakawn huamchhung, Rangvamual hnaih lamah man a ni.
Thudawn danin, Vanrampana hi kum 2021 khan Siaha District Jail atang tho hian a lo tlanchhuak tawh a, a thubuai neih hi rukruk lam kaihhnawih a ni deuh zel nia sawi a ni.