Khawtlang huapa ruang zawn titawp

Ruahsur nasa avanga May 28-a leiminin in a hnawl, nunna chan zinga mi 5 chu an ruang hmuh a la ni loa, Mizo danah ni sarih chhung zawn an nih tawh avangin khawtlang huapa zawn hna chu Thawhtanni khan tihtawp a ni.
Tarlan tawh thin angin May 27 leh 28 a Mizorama ruah leh thlipui thawkah Aizawl district hmun thenkhatah leiminin chenna in a hnawl a, mi 34-in nunna chanin an zinga 29 chu an ruang hmuh a ni tawh. June 3 thlenga ruang la hmuh loh hi mi 5 an ni a, Central YMA kaihhruaiin a inchhawkin Aizawl huamchhung YMA branch bakah sawrkar lama chhiatna thlen thulha chechhuak tura inzir chhuak leh para military force thlengin ruang zawn hna hi thawh a ni a; BSF leh Mizoram Police lamin an uisathiam an rawn thawhchhuah pui bawk.
Mizo dana ni sarih chhung zawn an nih hnu ah pawh – Deborah Lallawmawmi (11) d/o R Lalmuanzova Melthum; Lalthakima (42) s/o Lalhlira (L) Melthum; Lalvenhima (8) s/o Lalremtluanga Melthum; Ramdinsanga (thla 4) s/o Lalremtluanga Melthum leh Matthew Lalchhanhima (34) s/o Lalbiakzauva Aibawk te chu an ruang hmuh a la ni loa, Central YMA chuan khawtlang huapa ruang zawn hna hi Thawhtanni tlai dar 4.00 khan titawpin, hemi pual hian Aibawk leh Melthum/ Hlimen ah hun hman a ni.
Aibawkah hian Central YMA finance secretary MS Ralte chuan hmanpuiin, Hlimen/Melthumah hian Central YMA vice president Prof Lalnuntluanga leh general secretary Prof Malsawmliana ten an hmanpui a ni.