Khawvel hmun hrang hrang lum zual zel

Southern Europe chu heatwave in nuai chhunzawm zelin khawlum lutuk hian 40 degree Celcius pel zui zelin tunkar chhung chu awh ngei tura ngaih a ni bawk.
Health Ministry te chuan house-call service tichakin kum upa te chuan medical care an mamawhah pawn chhuah kher ngai lova an pan theih turin an ti a, hospital tinah heat station din a ni zui bawk.
Kum upa te bik vawnhimna tur rawtna 10 Ministry chuan tichhuak bawkin mipuite chu khawlum vanglaia pawn chhuak lo tura ngenin nitin tui 1.5 litres tal in turin an ngen bawk a, intihah leh exercise la miah lo tura ngen an ni bawk.
Tun hi tun thla chhunga heatwave in southern Europe a tuam tum thumna ni der tawhin Mediterranean chhehvel te chu a huam vek a ni.
“Southern Europe khawlum hian Italy leh a chhehvel ramte chu pizza oven lianah a siam a ni ringawt” tiin Hannaah Cloke, climate scientists leh physical geographer, University of Reading chuan a sawi a. “Thli lum Africa atanga tleh chuan khawmual leh tuipui te tilumin chuta tanga lumna chhuak zel chuan khawlum a siam nasa zual a ni” tiin a sawi.
Rome ah chuan 39 degree Celcius vel niin khawpui hmun thenkhatah chuan 40 degree Celcius kaina te pawh a awm a, hei bakah hian Sardinia leh Sicily te chu khawlum ber berna a ni bawk.
Electricity demand san em avangin Rome khawpuiin power mamawh tawk a nei lo bawk a, hetihlai hian Italian farm lobby Coldiretti te chuan khawlum lutuk chuan ranvulh te a nghawng nasat thu sawiin, bawng te chuan khawlum lutuk vangin hnute tui 10% velin an nei tlem an ti bawk.
Hetihlai hian Spain ah chuan karkalta Inrinni a La Palma a Canary Island a kangmei chhuak chu an la thelh mit thei lo va, thuneitute chuan khawlum ziaawm hret leh thli vawt chu beiseina an neih thu an sawi a. Kangmei hian thing hmun 4,600 hectares vel kang tawhin chenna in 20 chuang a kangchhe tawh bawk a. Mi 4,000 chuangte chu hmun hima thiar an ni bawk.
Spain a Aemet weather agency te chuan tuna heatwave thleng mek chuan Mediterranean chhehvel ram tin a huam vek dawn tia sawiin Spain chhim lamah phei chuan temeprature in 42 degree Celcius a kai thei an ti bawk a. Nilaini hnulamah temperature chuan tlakhniam lam a pan theih thu an sawi thung.
Aemet weather agency thupuangtu Ruben del Campo chuan anticyclone chuan Africa atangin thlilum chu Spain leh mediterranean ramah te a chhemlut tiin a sawi a, thli lum lutuk chuan ramngaw kang siam theihna a hawngzau hle an ti bawk.
Greece-ah thung chuan tlemin khawlumin ziaawm lam pan hretin ancient Acropolis leh hmun pawimawh dangte pawh hawnin a awm phah a. Mahse, ram ngaw kang Athens khawpui pawn maiah hmun hniha a thlen mek avangin harsatna nasa tak a thleng mek.
Southern Greece pumpui deuh thaw greater Athens pawh huam tel vekin kangmei chhuah theihna sang tak a ni a, Ningani atangin khawlum a zual leh tura ngaih a ni bawk.
Khawlum hian southern mediterranean chauh a nuai lo va, North Macedonia lamah pawh khawlum hian tun hnai ni 10 chhung zual lam panin temperature in 43C a kai a, Kosovo ah pawh thuneitu ten mipuite fimkhur turin an ti hial tawh bawk.