Khawvel pumah in leh lo chhuahsan maktaduai 110 vel an awm

Khawvel pumah nghaisakna te human rights bawhchiatna nasa te leh buaina avangtein chenna in leh lo chhuahsan maktaduai 110 vel an awm tiin U.N. High Commissioner for Refugees (UNHCR) chuan a sawi.
Refugee tipungtu ber hi Sudan tualchhung indona niin kumin April atang khan refugee maktaduai hnihin an pun belh phah a ni.
“Kan khawvel hekna lanfiahna dik tak a ni” tiin Filippo Grandi, UN Refugee Agency enkawltu chuan UNHCR’s Global Trends Report for 2022 tihchhuah a nih hmain Geneva ah a sawi a.
Nikum chhung ngawt khan mi maktaduai 19 vel zette chu chenna in chhuahsan lo thei lova siam niin heng zingah maktaduai 11 vel te chu Russia-in Ukraine a runin a hrin a ni a. Indopui II hnua khawvela in leh lo chhuahsan tam ber tum a thleng mek a ni.
“Emergency kan hmachhawn chamchi” tiin Grandi chuan a sawi a, nikum khan emergency dinhmun 35 lai awmin a hma kum aiin a let thum li velain a nasa zawk a ti a. “Mi tlemte chauhin headlines an chang” tiin Grandi chuan a sawi a, Sudan meuh pawhin Khawthlang khua leh tui te lakchhuah an nih hnu chuan frontpage an chang pha tawh lo tiin a sawi bawk.
Kum 2022 khan Democratic Republic of Congo, Ethiopia leh Myanmar tualchhung buaina avangin chenna in chhuahsan maktaduai khat chuang theuh an awm tih a ni bawk a. Heng mite hian a thenawm ramah inhumhimna an zawng tlangpui tih ni bawkin, maktaduai 35 vel atanga hmun thuma thena hmun khat te chu ram danga tlanchhia niin refugee an ni tiin UNHCR report chuan a tarlang bawk a. Heng refugee te hi low middle-incom ram Asia leh Africa ten lo chhawmdawl berin ram hausa Europe emaw North America te an tibuai lem lo tiin Grandi chuan a sawi bawk.
Turkey-in raltlan maktaduai 3.8 vel kawl mekin a tam ber chu Syrian an ni a, a dawttu chu Iran niin Afghans maktaduai 3.4 vel a kawl mek a. Ukrainain refugee maktaduai 5.7 velte chu Europe leh a piah lam ram thlengin an inzarpharh bawk a. Ram nei lo pawh kum 2022 khan pungin maktaduai 4.4-ah an kaichho tawh tiin UNHCR data chuan a tarlang bawk a.
Asylum dil pawh pung zelin US chu diltu ngah ber niin kum 2022 khan 7,30,400 lai diltu a nei a. Chutihrual chuan asylum dilte hnawl nasa ber ram a ni tho bawk tiin Grandi chuan a sawi bawk.
“Tuna mamawh ber chu asylum system siamthat niin tichuan rang leh chak zawkin thil kalpui theih a ni ang,” tiin Grandi chuan a sawi a. United States, Spain leh Canada te chuan tun hnaiah Latin America ah asylum processing centre dinin hei hi Mexico-US border ke ngata luh tum te tihtlem tumna tiin a sawi.
Asylum zawng an pun rualin nawrlet an pung zel bawk a. “Kan nawr let nasa a, immigration emaw refugee admission rules kan tikhauh tial tial a. Ram tam takin immigrants leh refugees te chu buaina an tawh chhanah ngaiin an dem bawk,” tiin Grandi chuan a sawi bawk.
Kar kalta khan European leaders te chuan Mediterranean paltlanga refugee te an tlem theih nan North Africa ram te sum lama puihna a puang bawk.