Khawvela hausa ber ni rei lo ber!

Oracle Chief Technology Officer, Larry Ellison, kum 81, chuan khawvela hausa ber nihna Elon Musk hnen atangin a pawt peng zuai a, mahse, nikhat pawh he title hi a kawl hmain Elon Musk bawkin khawvela hausaber nihna a rawn hauh leh ta a ni. An hausakna inthlauhna erawh dollar tluklehdingawn khat vel chauh a ni thung.
September ni 10 khan Oracle Corp. share man a pung thut a, hei vang hian a co-founder Larry Ellison chuan September ni 10 chhunah Elon Musk hausakna an rawn khum zuai a, Mark Zuckerberg leh Jeff Bezos te pawh rawn khumin, khawvela hausa ber a rawn ni hman.
Larry Ellison hi Forbes-in khawvela hausak lamah palina a a dah sa a ni a, September ni 10 chawhma lama Oracle share man rawn pung thut chuan Ellison hausakna chu dollar tluklehdingawn 192 atangin dollar tluklehdingawn 393-ah a rawn invawrh dawrh a, hetih lai hian Elon Musk hausakna chu dollar tluklehdingawn 384 a ni ve thung.
Mahse, September ni 10 closing-ah chuan Oracle share man hi tlahniam leh hretin, chuvang chuan Larry Ellison hausakna pawh dollar tluklehdingawn 383.2-ah a tlanhniam leh a, Elon Musk hausakna chu dollar tluklehdingawn 384.2 tho a la nih avangin Musk bawkin hausa ber nihna a hauh leh ta a ni. Larry hi darkar rei vak lo chu khawvela hausa ber a ni hman zuai a ni.
Hetihrual hian Elon Musk hausakna hian kuminah hniam lam a pan hret hret a, a sum bawm lian ber Tesla share hlutna pawh kuminah 14%-in a tlahniam tawh a, chutihrualin a sumdawnna dang SpaceX, xAI leh X te chu a la kaltluang viau thung.
Larry Ellison hian Oracle share 40% neiin, he company dintu zing ami niin, kum 37 chuang company CEO a nih hnuah 2014 khan a chawlhsan a, mahse, CTO a la ni zui ta tho a ni.