Khawzawl HSS-ah building sak belh

Khawzawl Higher Secondary School-a Science & Commerce building sak belh chu Thawhtanni khan Tuichang bialtu MLA, deputy chief minister Tawnluia’n a hawng.
Khawzawl HSS provincialised a ni ta chu zirlai leh zirtirtute a lawmpui tih deputy chief minister hian a sawi a. Cabinet thutkhawm hnuhnung berah Mizorama sikul 311 chu dinhmun tha zawkah sawrkarin a hlankai thu leh Khawzawl district-ah ngei pawh sikul 15 chu dinhmun tha zawka hlankai an nih thu a sawi. Sawrkarin lumpsum-a sikul a puihna pawh tihsan a ni, tiin, category A-in cheng nuai 6, category B nuai 4, category C nuai 2.5 an dawng tawh dawn tih a sawi a ni.
Khawzawl HSS Science & Commerce Block panna kawng siam nan hian MLA Fund atangin cheng nuai 5 a pe tih a sawi bawk.
Khawzawl bawrhsap K. Lalrohlua sawi danin, Khawzawl Model High School-ah HSLC Exam Center thar neih a ni a; DoNER ministry-in khum 50 awmna tur Khawzawl Hospital sakna a pawm fel tawh a ni.
Khawzawl HSS Science & Commerce building hi cheng nuai 244.4 senga sak a ni a. Zopa chhiara chhawng thum a ni. Science laboratory, teachers’ common room, principal room leh art & craft room, classroom pali a awm a ni. Khawzawl HSS Science stream hi kum 2016-a din a ni a, Commerce stream hi 2019 ah din a ni thung. Tunah hian zirlai 51 awmin, zirtirtu 11-in an enkawl a ni.