Khua leh veng inelna chhuih hawn a ni ta

Cheng nuai hnih leh Sechal hlawh chhuah theihna tur GIG Motors All Mizoram Inter Village Football Championship 2024 chu Inrinni zan khan Aizawl Dawrpui Multipurpose Hall-ah Pu John Lalpeka, CEO, GIG Motors in a pet hawng ta.
Mizoram dung leh vanga Village Council, Local Council leh Joint Village Council team te inelna tur, kumina Zoram a football khawmpui lian berah hian team 88 in chungnung ber nih tumin November ni 11, Thawhtanni atang hian Aizawl a khelmual pathum; Rajiv Gandhi Stadium, 1st Bn. MAP Ground leh Chite Ground ah te an inkhel tan dawn a ni.
IG Motors All Mizoram Inter Village Football kick off na huna khuallian Pu John Lalpeka chuan Mizoram Football Association (MFA) te nen thangkhat lian zet an thawhho tawh hnuah football hmasawnna atana MFA a inhmang zawng zawngte chu an inpekna thuk tak a hmuhin fakawm a tih thu a sawi. Mi nawlpui hmuh phak lohah thil tam tak an tih thu te, inchhung lum leh hna tul kalsan a thalaite tan thil tha an tih thin thu sawiin, he inpekna hi tawpsan mai lo tur leh lukhawng a neih chhoh zel a beisei thu a sawi bawk.
Mizoram Premier League huaihawtna kawnga MFA in a thawhpui tawh thin GIG Motors neitu Pu John Lalpeka chuan Inter Village Football inelna chu hmun kilkhawr zawka talent nei tha tak takte zawn chhuahna kawng pawimawh tak, hun danga remchanna la nei ve ngailote pawhin leirem an rah ve theihna hun pawimawh tak a nih a rin thu a sawi. He inelna atanga player pahnih-khat chauh pawhin hlawkna an lo têl a, an football hmakhawsuihna hun pawimawh a lo nih hlauh chuan he tournament hi a hlawhtlingah a ngaih tur thu a sawi. Football Association leh mi inphalte inpekna avanga inelna mumal tak huaihawt thin hian rahtha a chhuah avanga Mizo thalai tam takin eizawnna ngelnghet leh hlawk tak tak nei a, in leh lo tha tak tak an din tawh thu a sawi bawk.
Pu PC Vanlalhruaia, MFA Sr. Vice President leh Chairman, Organizing Committee, GIG Motors All Mizoram Inter Village Football Championship 2024 chuan Football dan hnuaiah zawm ngai te zawm chung leh theihtawp chhuaha he inelna khel tur hian team tinte a ngen a, Organizing Board chuan team tinte duhsakna an hlan tih a sawi bawk. Tunhnaia Zoram football inelna huangchhunga match fixing man chhuah a nih chungchang sawiin, “Hei hi a tawpna ni se, football inelnaah hetiang hi thleng leh ngai tawh lo se” tiin, football dan hnuaia hlim taka inkhelh chu MFA duhsam ber a nih thu a sawi.
Tv. Hmingthansanga, Secretary, Organizing Committee chuan football inelna lian lo awm tur chungchang sawifiahin, match ball atan Nivia Shining Star hman a nih dawn thu te, khelmual pathuma inelna kalpui a nih tur thu te, kumin tournament ah hian thupui hlapui nei lo mah ila, buaina tel lo, football khawmpui lian hlimawm taka hmang turin team tin a ngen a. Tunhnaia Zoram football hmaibal tifai leh tura tan la thar turin player tinte a ngen bawk.
Kick-off hun hi team hrang hrang aiawh an kal tha hle.