Khua vawt mah se thlasik a na lo

December a liam a, January pawh a liam tawh. Thlasik lai tih takah khua a vawt a, mahse thlasik a na lo.
Tun tum thlasik hi a na lo a, vawt vin vur a awm lem lo. Mipuiin vawt chu an ti tho a, mahse vawt lutuk a ni lo.
State Meteorological Centre-in an chhinchhiah danin, December-ah khan a vawh ber laiin 11°C a ni a, hei hi vawt tak a ni lo.
Mizoramah December aiin January a vawt zawk thin a, kumin January-ah a vawh ber laiin 10°C a ni. December-a a vawh ber lai aiin a vawt hret.
Lum leh vawt tehnaah hian ni khat chhunga a vawh ber lai (minimum) leh a lum ber lai (maximum) an chhinchhiah thin a, a vawh ber laia a vawh viau hian khua a vawt tih chu a chiang mai. Chutih rual chuan khami nia a lum ber lai (maximum) khan a sang viau lo a nih chuan khami ni khan mihringin vawt a ti tho. Kumin January-a hniam ber lai 10°C a kawh ni kha ni 10 a ni a, khami nia a lum ber lai khan 20°C niin, 20°C hi a lum loh avangin khami ni pawh khan mihring tan khua chu a vawt tih tur a ni.
A vawh ber lai lei a lum ber lai enin, January thla tawp lamah khan a lum ber lai hi a hniam char char a, ni 28-ah a lum ber laiin 21°C niin, chumi bak chu 20°C a pel lo. Chuvangin thla tawp lam pawh khan khua a vawt tih tur chu a ni.
State Meteorological Centre-in an chhinchhiah danin, kumin January thla kha chawhrualin 17.6°C a ni a, nikum January kha chawhrualin 15.6°C a ni, nikum January a vawt zawk. 2024 December kha chawhrualin 18.8°C a ni.