Khualzin tam zawk hip tumin mipui hriat tur inhrilh dawn

Kumin July 27 atanga August 3 inkar hian Tourism Awareness Week hman a ni dawn a. Hemi chhung hian Tourism department chuan “Tourism for All” tih thupuia hmangin tourism chungchang inzirtirna, khaw thlan bik tan intihsiak leh talk show hmangte in hriat tur pawh inhrilh a ni dawn.
Inrinni khan Tourism minister Lalrinpuii chuan ‘Tourism Awareness Week 2024’ hi Aizawlah a hawng a. Mizorama tourism tihmasawn tur chuan a chhunga cheng mipui kan pawimawh, tia sawiin, tourism hmasawn theihna (potential) tam tak a la awm a, tourism chungchanga kan rilru puthmang leh kan dawnsawn danah hma kan sawn tlan a pawimawh tih a sawi a ni.
India ram chu kawvela mihring tamna ber a nih avangin tourism kan ngaihtuah hian, ram pawn ami kher beisei loin, ram chhung mi atang ringawt pawhin tourist thahnem tak Mizoramin a hmu thei tih sawiin, “State dang leh ram danga kal changin, ami chengten tha taka min lo biak chuan kan tlangnel nghal em em a. Mizote pawh khualzin kan lo dawnsawn dan kan thiam chuan Mizoram nuam an ti anga, lo kal nawn an chak zel dawn a ni,” a ti.
Tourism secretary Dr Lalrozama pawhin kan khualzinte kan duat chuan Mizoram nawm zia zau zawkin min puan darh sak zel dawn tia sawiin, hetihrual hian fimkhur tak chunga ke pen a tul tih a sawi. “Ram thenkhatah chuan khualzin tam lutuk avanga harsatna an tawhte hre chungin, kan tlin tawk ang zelin hma lak a tul,” a ti.
Tourism Awareness Week neih chhunga ‘Tourism Village Competition’ neih a ni dawn a. Khaw thlan bik 8 – Sailam, Biate, Sairang, Sangau, Aibawk, Baktawng, Buangpui leh Ralvawng an intihsiak dawn a ni.
Tourism Awareness Week hawnna kalte hian khualzin hip tura ruahmanna hrang hrang zawm turin an intiam a ni.