Mualkhang Bottling Plant thar thawhtu chu sawrkar hmasa – MNF

Mualkhang Gas Bottling Plant thar thawh leh tih len tum chungchangah Supply minister ni laiin an sawrkar hnua hmalakna vek angin a sawi niin MNF party chuan an sawi a. MNF sawrkar laia tihfel tawh, MLA inthlan puanin a nan tak avanga khawtlai mai mai ta zawk a ni tih an sawi.
MNF Gen. Hqrs. thuchhuak chuan, MNF ministry-ah 2019 November 5 atang daih tawha IOC Ltd hotuten hetihlai chief minister Pu Zoramthanga bakah FCS&CA minister Pu K Lalrinliana te an hmuh tuma sawi ho tan tawh, a tihlenna atana ram mamawh ngaihtuahsak an lo tiam tawh niin, 2020 January 19-a safety norms phak loh avanga he Bottling Plant khar a nih hnu, March 11-ah FCS&CA minister hoin tharthawh leh dan tur a hmuna en a nih thu te a sawi.
‘2021 February 9 khan Mizoram sawrkar hmalaknain Mualkhang Gas Bottling Plant hi siamthat leh tih len a nih tur thu puan a ni a. Mizoram sawrkar chuan siam lenna turin ram, hectare 2-a zau chu tuna Bottling Plant awmna ram hrulah cheng nuai 47 a lei belh a, IOCL hnenah a hlan zui. Plant hmasaa cylinder 2500 thun thin chu nitin cylinder 7000 (truck phur 24) siam tum a ni a; Plant thar hi kum khata metric ton 30000 siam chhuak thei tura duan niin, thla 24 chhunga siam zawh tura ruahman a nih thu MNF ministry khan a lo puang daih tawh a ni,’ a ti.
Hemi hnu ah pawh sawrkar leh IOCL hotute hi indawr chhunzawm zelin, Mualkhang LPG Bottling Plant siamthat leh tih lenna tur chu lung phum mai theiha peih a nih hnuah Union Minister of Petroleum & Natural Gas Hardeep S Puri chu phum tura beisei a ni a. Indawrna a kal chhung leh sanction order nghah a nih mek laiin 2023 MLA inthlanpui puan a ni a, election model code of conduct puan zui a nih avangin MNF ministry hunah lungphum phum leh sanction order hmuh hman a ni ta loa, sawrkar tharin sawrkar hmasa hmalakna rah a hmu ta mek tih a sawi a ni.
‘Mizoram mipui nitin mamawh gas hnianghnar tak hmuh theihna tura MNF ministry hmalakna – LPG Bottling Plant siamthatna leh tih lenna tur sanction order a chhuak ta hi lawmawm kan tiin, sawrkar laipuia Ministry of Petroleum & Natural Gas leh Indian Oil Corporation Limited chungah lawmthu kan sawi a. Ram mipui mamawh LPG Bottling Plant lian zawk kan neih theihna tura theihtawp chhuahtute – chief minister Pu Zoramthanga, FCS&CA minister Pu K Lalrinliana, Revenue minister Pu Lalruatkima te bakah a hlawhtlin theihna tura tha leh zung sengtute chungah lawmthu kan sawi a ni,’ MNF thuchhuak chuan a ti.
ZPM kaihhruai sawrkar chu naupang chhe zia pu chunga sawrkar kal tawhte puhchhiatna tur ringawt zawng tawh loa, puitlin lam pan turin an duhsak tih a sawi a. Sawrkar hmasa hmalakna avanga sanction order awm ta Mualkhang LPG Bottling Plant siam lenna leh siamthatna tur pawh ram mipui nitin mamawh phuhrukna tur ram rotling a nih ngei theih nan uluk taka vil zui turin ZPM sawrkar leh FCS&CA minister an chah tih a sawi a ni.