Khuarel chhiatna tuar na zingah India langsar

On Feb 14, 2025 15 0

Khuarel chhiatna tuar na zingah India langsar
India chu kum 1993 leh 2022 inkara khaw awm dan uchuak tak avanga chhiatna thleng tuar nasa ber ram 10 zingah a tel a. Hetih chhunga khawvela thihna thleng 10% chu India-a mi niin sum zawng pawhin hloh 4.3% chu India-a mi bawk a ni.
Bonn leh Berlin, Germany-a sorkar puih ni lova hmasawnna, khuarel leh mihring dikna chanvo thil buaipuitu, Germanwatch-in Climate Risk Index, 2025 a tihchhuahah India hi khuarel chhiatna tuar nasa ber parukna a ni a. Dominica, China, Honduras, Myanmar leh Italy te hnuaiah a awm.
India hian hetih chhung hian tui lian, khaw lum leh cyclone a tuar nasa a. Kum 1993, 1998 leh 2013 khan tui lian nasa tak a tuar a, khaw lum uchuak takin kum 2002, 2003 leh 2015-ah a tuan bawk.
Kum 30 chhung hian India hian khaw awm dan uchuak tak hi tum 400 chuang a tuar a, $ tluklehdingawn 180 chan niin thi 80,000 an awm niin Germanwatch chuan a tar lang a. Hetih chhung hian khawvel pumah thi 8,00,000 chuang an awm a ni.
India-in a tawrh nat zingah hian 1998 Gujarat cyclone leh 1999 Odisha cyclone te, kum 2014-a Cyclones Hudhud leh 2020-a Cyclone Amphan te, kum 2013-a Uttarakhand tui lian te, kum 1998, 2002, 2003 leh 2015-a khaw lum uchuak tak, 50°C dawn a kai te pawh a tel.
Germanwatch hian ranking an siam hi International Disaster Database (Em-dat)-in khuarel chhiatna thlen dan a siam leh International Monetary Fund (IMF)-in sum leh pai lam a nghawng dan a chhutna ringin an siam a. A tuar na zual 10 zingah hian Greece, Spain, Vanuatu leh Philippines an tel bawk.
“Sik leh sa avanga buaina hi khawvel himna tiderthawngtu lian tak a ni ta a, ram hruaitute hian an ngaihven a ngai hle a ni,” tiin Germanwatch-a Division for International Climate Policy hotu, Laura Schaefer-i chuan a sawi.
“Kum 30 liam ta chhung khan khawvel chhim lamin khaw awm dan uchuak an tuar nasa hle a. Heng rama thil thleng erawh hmar lam ramte aiin kan hre tlem thung a, hre vek thei ila chu mihring leh eibara an tawrhna hi a na hle ang,” tiin Schaefer-i chuan a sawi bawk.