Kohhran hruaituten naupang venhimna kaihhnawih dan zir

District Child Welfare and Protection Committee Hnahthial buatsaihin kohhran hruaitute tan naupang venhim leh a kaihhnnawiha dan leh hrai hriat tur inhrilhhriatin Ningani khan hun hman a ni.
Hmanpuitu district bawrhsap K Vanlalruati chuan, khawvel changkang zelah naupang venhimna uluk lehzual a tul tawh tih sawiin, chumi kawngah chuan kohhran chu sikul tluk zeta inzirtirna hmun pawimawh a ni tih a sawi. Kohhran zirtirna chu naupang venhim leh thanlenna kawnga pawimawh tak, mipui innghahna leh mipui nuna thleng thuk ber a nih avangin kohhran hruaitute tan he hun hi buatsaih an ni tih a sawi a ni.
Naupang kum tling lo tana dan pawimawh pahnih – Juvenile Justice Act 2015 leh POCSO Act 2012 chungchang a sawizau a. Dan ang taka kum tling lo dan bawhchhiate nun siamthat tum a nih dan leh naupang kum tling lo chunga dik lo taka che thinte chunga hremna awm theih dan a sawi.
“Mizote chu inngaidam mai thin hnam kan ni a, thil tha tak a nih rualin dan bawhchhiate an huangtau phah thin. Chuvangin ngaihdam chin tawk hriat a, naupang chunga dik lo taka che thin leh chet tum an awm chuan a rang thei ang bera thuneitute hnena report thuai zel a ngai a ni,” K Vanlalruati hian a ti.