Kohhran, NGO leh party-ten Zohnahthlakte tawrhna thlen dawn

Kohhran, NGO leh party-ten
Zohnahthlakte tawrhna thlen dawn
Mizorama kohhran, tlawmngai pawl leh political party-te chuan Manipur-a Zohnahthlakte tawrhna leh a kaihhnawih chu sawrkar laipui hotute hnenah aiawh intira thlen an rel a. He buaina thlengah hian harsatna tipunlun lo turin Mizo mipui an chah.
Mizoram Kohhran Hruaitute Committee (MKHC), political party hrang hrang, Mizoram Journalists’ Association leh NGO hrang hrang aiawhte chu Inrinni khan an thukhawm a. Manipur-a Zohnahthlakte harsatna tawh sawihoin, mipuite ngenna an siam.
Manipur tualchhung buaina avanga mi tam takin nunna an chan leh in leh lo leh sakhaw biak in hal leh tihchhiat a ni chu pawi an tiin, an tuarpui takzet tih an sawi a. Remna leh muanna tha tak a awm theihna’n chak taka hma la turin Manipur sawrkar leh sawrkar laipui an ngen a, Mizoram sawrkar pawh chak taka hma la zui zel turin an ngen tih an sawi.
Ei leh bar, nitin mamawh hrang hrangah harsatna an tawh lohna’n tan la tlang turin Mizo mipui an ngen rualin, he buaina avanga mimal hlawkna leh inhaivur zawnga hma la lo turin an ngen.
Manipur atanga sahimna zawnga rawn lutte lawm taka lo dawngsawng tura inchahin, Mizoram mipui chu theihtawpa lo tuamhlawm turin an ngen a. ‘Manipur-a tangkhang mek kan unaute him taka Mizoram an lo let theihna tur leh an chenna hmuna nunphung pangngai tak an kalpui leh theihna’n hma la turin Mizoram sawrkar kan ngen a ni,’ a ti.
Manipur tualchhung buaina avanga Zohnahthlak unaute tawrhna chungchang leh a kaihhnawih chu sawrkar laipuiah thlen nise, tiin, all party, NGO leh MKHC ten aiawh intirin New Delhi-ah thuneitute hmuh nise an ti.
He buaina avanga harsatna tipunluntu niloa, remna siamtu ni theuh turin Mizo mipui an ngen tih an sawi a. Manipur tualchhung buaina avanga Zohnahthlakten harsatna an tawh leh a kaihhnawiha Mizoram sawrkar leh Central YMA hmalakna lawmawm an ti a, an hmalakna an thlawp tlat tih an sawi.