Kolasib-in raltlan buaipui dan tur rel

Kolasib-in raltlan buaipui dan tur rel
Kolasib district bika Manipur atanga raltlante dawnsawn dan tur leh chhawmdawlna pek dan tur relin Thawhtanni khan district bawrhsap John LT Sanga hoin an thukhawm a, a kaihhnawih sawrkar official-te, village council leh tlawmngai pawlte an tel.
Kolasib district-ah hian Manipur atanga raltlan hi Saipum, Saiphai, Pangbalkawn, Phainuam, Vairengte leh Rengtekawnah an thahnem zual tih report a ni a. Raltlan mi 750 chuang chhinchhiah tawh niin, an la luh belh zel a. Chhungte leh hmelhriat belh tur nei an awm laiin, Community Hall-a riah tir chhawngkaw thahnem tak an awm a ni. Khaw thenkhatah chuan Relief Camp sak tum a ni tih sawi a ni bawk.
Raltlante eitur leh mamawh hrang hrang ruahman sak chu a ranglama ngaihtuah a tul thu sawi a ni a. Hemi kawnga hma la tur hian Village Council President kaihhruaina hnuaiah ‘Village Level Refugee Relief Committee’ din lailawk nise, an ti.
An district khaw hrang hranga Manipur atanga raltlante mamawh zualpui phuhrukna’n Sub Hqrs YMA Kolasib kaltlangin khaw tinah vehbur khawn tum a ni a. Hetihrual hian pawl leh mimal inphal, raltlan tanpuina pe duh tan bawrhsap office kaltlanga pek dan tur ruahman nise tih a ni.
Manipur-a chi leh chi inkara buaina chhuak avanga Zohnahthlakte harsatna chu an tawrhpui thu leh Kolasib district-ah thlamuang tak leh hahdam taka an awm theihna’n ruahmanna siam thuai tul an tih rualin, raltlan thlenkhawmna hmunah chuan inkaihhruaina mumal taka kalpui a pawimawh tih sawi a ni.