“Zoram himna leh Zohnahthlakte himna thuah MNF tlanchhe ngailo”

“Zoram himna leh Zohnahthlakte
himna thuah MNF tlanchhe ngailo”
Mizoram himna leh Zofate himna thu ah MNF sawrkar a tlanchhe ngailoa, a mite thlavang huai takin a hauh ngam zel tih MNF adviser J Malsawmzuala Vanchhawng chuan a sawi.
Thawhtannia MNF office-a inkhawmah MNF Publicity Board vice chairman ni bawk J Malsawmzuala chuan ramri hauh leh thildangah pawh Pu Zoramthanga kaihhruai sawrkar chuan ram, hnam leh sakhua himna turin huaisen takin dinna nghet tak a nei tih a sawi a. Manipur buaina thleng mekah pawh sawrkarin a tih tur diktak a hun takah a ti zel tih a sawi.
Mizoram mi, Manipura tangkhangte sawrkarin a ngaihven a, a hruai haw zel dawn a; Zohnahthlak raltlante tan pawh ruahmanna siamin, sawrkarin a mah maia thuthlukna siam loin NGO, kohhran leh zirlai pawlte nen thawk hoin thutkhawm vawi engemawzat koin, kan mite himna turin fimkhur taka hma lak a ni a, hlawhtlinna kan hmu ta mek chu sawrkar chauh niloin, Mizo mipui tanrualna rah a ni tih a sawi.
“Kan mite hruaichhuak tur leh an himna tura sawrkar ruahmannate kha hlawhchham thei a ni a. Hlawhtlinna lawmawm tak kan hmu ta zel hi kan hruaitute vang niloin, Pathianin Zofate tawngtaina a chhanna a ni tih a chiang hle,” a ti bawk.
MLA term khat pawh a liam hmaa, MNF sawrkarin harsatna a tawh zozai chu tunhmaa la thleng ngailo, tunhnu zelah pawh a thlen leh rinawm loh khawpa nasa a ni tih MNF adviser hian sawiin, “Ke chheh sual zeuha hnam pum tawrhna thleng thei a ni a. Sawrkarin fimkhur takin hma a la a, duhthusam ang diak diaka hma lak theih loh tamtak a awm. Theihtawp a chhuah mek a, a chhuah zel dawn a ni,” a ti.
Hetiang dinhmun harsaa ram, hnam leh sakhaw himna tura mawhphurhna la tur hian hruaitu huaisen leh dinna thlakkual zung zung mi nilo, mi nghet leh a tul huna luhlul tlat ngam ramin a mamawh a. Chutiang tura Pathianin hun harsa leh buaina tam tak hmachhawn tur chuan MNF a dah tih a sawi a ni.