KS-a sawi nge i awih Lalsawta sawi?

Cheng nuai 25 chungchangah sawi dan inang lo a
awm a, a hre tura ngaih pahnih, minister hlui ve vein an sawi dan a inang lo.
Minister Lalsawta, Congress president-in minister a nih laiin a hriat lohvin an inah tute emawin cheng nuai 25 an lo dah a, an nupain an dah let leh niin a sawi a, minister hlui ve bawk KS Thanga’n hei hi a dik lo niin a sawi ve thung.
KS Thanga chuan Lalsawta remtihnain tu emaw hnenah amah Lalsawta puihna tur pawisa cheng nuai 25 a dil niin a sawi a, anni’n lo pein amah KS Thanga kutah an dah a, chu chu Lalsawta’n a la niin a sawi.
Cheng nuai 25 chungchang hi a hmain titi a lo tling tawh a, kar hmasa Zirtawpni-a Congress party atanga a banna lehkhaah KS Thanga hian thu dang rawn neiin, cheng nuai 25 chungchang hi a rawn sawi a ni.
“Pu KS-a sawi nge miin an rina ka sawi? Chu chu a ni mai a,” Lalsawta chuan a ti. “An rin zawk zawk a ni mai lo’m ni?” a ti bawk.
Engtia tihlet nge a tum tia zawhna chhangin Lalsawta chuan, “Mi han khin let vak hi a dik em? Pu KS-a te han khin let vak hi a dik em?” a ti.
Chutih rual chuan a tul anga ngaihtuah a nih tur thu a sawi a, “A tul a nih chuan OB te’n an ngaihtuah ang chu,” tiin Congress party office bearer te’n a tul a nih chuan an ngaihtuah ang tih a sawi.
Zirtawpni chawhma lamah Congress party-in political session an nei a, hetah hian Lalsawta chuan, “Corruption ber kherah hi chuan min beih chuan dawt a ni a, finfiahna an neih loh chuan, ka man hi a to khawp ang,” tiin a sawi. Chawhnu lamah KS Thanga’n banna a thehlut a, a tukah Congress party-in thuchhuah siamin, “June ni 9, 2023-a Pu KS Thanga banna lehkhaah khan thu dik lo leh puhna dik lo (allegation) tam tak a awm a, Khang thu dik lo leh puhna dik lote kha kan president zahawm tak tihhminghliau tumna a nih bakah, mawi lo taka Congress party beihna a nih avangin a tul dan angin defamation case pawh kan la ngaihtuah ang,” an ti.
Congress president Lalsawta chuan an party an lungrual niin a sawi a, “Kan inlungrual, kan inpumkhat tha,” tiin, “Kan ram siamthat kan tum a, chumi atan chuan sorkar kan tum a. Thuneihna changtu nih a ngai a, chumi tur chuan lungrual takin theihtawp kan chhuah a ni,” a ti.