Hmeichhiate humhimna tur bul tan

Hmeichhiate humhimna tur bul tan
Hmeichhiate humhimna tura sawrkar laipuiin ruahmanna a siam pakhat, Mission Shakti chu Mizoramah pawh kalpui tan a ni a. Thawhtanni khan Social Welfare & Tribal Affairs minister Er. Lalrinawma’n a khuhhawng.
Minister chuan hmeichhiate dinhmun chawikang turin a hmei a pa in kan pawimawh a; an chanvo chang thei tura dawmkan leh rahbi siamsak chu kan tih makmawh a ni, tiin, sawrkar laipuiin hmeichhe dinhmun a ngaihpawimawh em avangin scheme tha tak tak a kalpui mek a, Mission Shakti pawh hian hmeichhiaten hleilenna an tawrhna lakah nasa takin venhimna leh chhawmdawlna a pe dawn tih a sawi a ni.
Women & Child Development director Zoramthangi Chhangte chuan Mizorama Mission Shakti kalpui dan tur a sawi a. Mission Shakti hnuaiah hian state level-ah State Hub for Empowerment of Women awmin, district tinah District Hub for Empowerment of Women an awm a. Universal Women Helpline, hmeichhia harsatna tawkten phone hmanga an harsatna an thlen theihna turin engtik lai pawhin an duty a, an ni hian an hnena harsatna thlentute an mamawhna zawn zela tanpui thei turin an lo inhawng thin a ni. Heng bakah hian district tinah hmeichhia tanpui ngaite leh harsatna tawkte tan tlukluhna tur One Stop Centre leh hmeichhe baihvai leh hleihlenna tawkte inhumhimna tur Shakti Sadan (Swadhar Greh Home) chu engtik lai pawhin an inhawng reng a. Hmeichhia leh naupang tanpui ngaite tan phone number 181 leh 1098 ah biakpawh theih reng a ni bawk.
Hun hman zawh hian tunhnaia HSSLC result chhuaka hmeichhe topper-te lawmpuina thuziak hlan nghal a ni.