Kuhmum hman loin kan par nghal – Lalduhoma

Kuhmum hman loin kan par nghal
– Lalduhoma
Congress leh MNF sawrkar chu an kuhmum rei lutuk a, ZPM sawrkar erawh kuhmum hman meuh loin an par nghal mawlh mawlh mai tih chief minister Lalduhoma chuan a sawi.
Nilainia Hriangtlang khuaa Hrangturzo Bial West Block Conference a hmanpuinaah ZPM leader Lalduhoma chuan, tunlai hian eptu lamin ZPM chu an kuhmuma parah leh sawrkar hmalakna tam tak chu an lo ruahman sa nia an sawi thin thu sawiin, “Keini sawrkar hi Pathianin mal min sawm a, kan sawrkar hlawt a, hlawtlinna tam tak kan chang nghal. Congress leh MNF kha an lo kuhmum rei lutuk a, keini chu kuhmum hman meuh loin kan par nghal mawlh mawlh mai a ni,” a ti.
Pathian malsawmna an dawng nasa a. Sum an enkawl thiam avangin ‘efficiency in financial management’ ah cheng nuai 35000 an dawng a. GPF-ah sawrkar hnathawk a mamawh apiang an pe a, pension 30000 dawn an tihfel sak bawk tih sawiin, “16th Finance Commission-in kum 5 dang lo awm leh tura sum dawn tur an relnaah India rama state dawng hnem ber 4-na kan ni thei a ni,” a ti.
Hrangturzo bialtu MLA, adviser to chief minister Lalmuanpuia Punte pawhin thu sawiin, Budget Session-ah sawrkar lai an che tha a. Chief minister taima, mahni department enkawl hrechiang leh zir peih an nei a. Finance lama CM puitu Pu TBC Lalvenchhunga nen an thawhrim zar an zo a, sum enkawl kawngah an kaltluang hle tih a sawi.
“Minister dangte pawh sum lama hlemhle leh rinawm lo an awm lo a. MLA kan din dawna kan intiamna bawh pelh kan la awm loh zel avang hian sawrkar zel tur pawhin keini bak kan awm lo,” a ti.