Kum kal mekah khuarel chhiatna vangin mi 2,936 thi

On Feb 6, 2025 9 0

Kum kal mekah khuarel chhiatna vangin mi 2,936 thi
Sorkar kum kal mek, 2024-25 (January 27, 2025 thleng) khan India-ah khuarel chhiatna avangin mi 2,936 an thi.
Thawhlehnia Lok Sabha rorel inkhawmah sorkar chuan hei hi tar langin chhiatna zingah hian tui lian leh lei min pawh telh a ni a. Ran vulh 61,826 chân a ni a, chenna in nuai 3.63 chuang chhiain thlai chinna ram hectare nuai 14.24 a chhe bawk.
Himachal Pradesh chu khuarel chhiatna thleng avanga thi tamna ber niin mi 408 an thi tih chhinchhiah a ni a. Madhya Pradesh (373), Kerala (355), Maharashtra (206) leh Karnataka (185) ten an dawt.
Assam-ah mi 128 thi awm bawkin hmarchhak state hi chenna in chhiat tam berna hmun a ni thung a, nuai 1.56 dawn a chhia a. Tamil Nadu chu thlai chinna hmun chhe nasa ber niin hectare nuai 4 a chhia.
Sorkar laipui hian khuarel chhiatna tuar state sorkarte pui nan State Disaster Response Fund (SDRF) leh National Disaster Response Fund (NDRF) atangin Rs. vaibelchhe 26,841.60 a pe chhuak a. “Chhiatna thlenga a mawh latu ber chu state sorkar an ni thin a; mahse, sorkar laipui hian sum leh mamawh dangin a puibawm thin a ni,” tiin Minister Rai chuan ziaka zawhna a chhannaah a tar lang.
Inter-Ministerial Central Team (IMCT) 14 tihchhuah niin heng team hian Assam, Andhra Pradesh, Mizoram, Kerala, Nagaland, Tripura, Gujarat, Telangana, West Bengal, Bihar, Himachal Pradesh, Odisha, Tamil Nadu leh Puducherry-a chhiatna thlen dan an en a. An thil hmuh an report atangin NDRF atangin puihna sum pek belh thin an ni.
SDRF-ah hian thawh khatnaah Rs. vaibelchhe 11,200.40 pek tawh niin thawh hnihnaah Rs. vaibelchhe 5,365.60 pek chhuah leh a ni a. Himachal Pradesh, Karnataka, Mizoram, Sikkim, Tamil Nadu, leh Tripura te chuan NDRF atangin Rs. vaibelchhe 4,050.91 an dawng a. Karnataka chuan Rs. Vaibelchhe 3,454.22 a dawng bawk.
“Fund-te hi sorkarin a pawm kaihhruaina anga pek chhuah thin a ni a, state-te chuan SDRF hi a tul angin an hmang thei thung,” tiin Rai chuan a sawi a, a tul angin NDRF atanga pek belh thin an ni tih a sawi.