Kum khata chhunga chanchinbu mi that tam ber Israel

Kum khata chhunga chanchinbu mi that tam ber Israel
Reporters Without Borders (RSF)-in report a siamah Israel chu kum 2025 chhunga chanchinbu mi that tam ber ram a ni.
Israeli sipaite hian Gaza-a beihpui an thlakah Palestinian chanchinbu mi 29 an that niin RSF-in kum tina report a siam thin chu Thawhlehni khan a tichhuak a. Kum thum chhung a zawna chanchinbu mi that tam ber a ni ta a ni.
Kum 2025 chhungin khawvel pumah chanchinbu mi 67 thah an ni a, kum 2024 aiin pakhatin a tam.
RSF Director General Thibaut Bruttin-a chuan, “Kuminah chanchinbu mi 67 thah an ni a – tihpalh a ni lo va, pawi khawihna tuar an ni a. An hna an thawh avanga thah leh bitum an ni,” a ti.
Bruttin-a hian khawvel huap pawlte chu indona chhuahna hmunah chanchinbu mite venhimnaah an ‘hlawhchham’ niin a sawi a, khawvel pumah ‘sorkar huaisenna’ a tlahniam niin a sawi.
“Chanchinbu mite hi an thi a ni mai lo va, thah an ni,” a ti.
Mexico chu chanchinbu mite tana ram hlauhawm ber pahnihna a ni a, kum liam ta chhungin mi pakua thah an ni.
Indona hmun, Ukraine-ah kum 2025 chhungin chanchinbu mi pathum thah an ni a. Sudan-ah pali thah ni bawkin chanchinbu mite tana ram hlauhawm zual an ni tih RSF chuan a tar lang.
RSF chuan chanchinbu mite hi an hna avangin lung in tantir an ni tih an sawi a. China chung tang tamna ber niin 121 an ni a. Russia (48) leh Myanmar (47) chuan an dawt.
December 1, 2025 thleng khan ram 47-ah chanchinbu mi 503 man an ni.
Report-ah hian ram 37-ah chanchinbu mi 135 chin hriat loh an ni a, 20 dang chu hren mek an ni tih an tar lang bawk.
Kum khat liam ta chhunga chanchinbu mi thah 67 zinga 43% chu Israeli sipaiten Gaza Strip-a beihpui an thlaknaah a ni tih chanchinbu zalenna beitu pawl hian an sawi.
Tum khata thihna tam ber chu August 25-a Gaza chhim lam damdawi in beihna kha niin chanchinbu mi panga an thi a ni.
Israel-in Gaza a beih chhung thla 26-ah khan chanchinbu mi leh chanchinbua thawk mi 300 dawn thah an ni a, thla tin 12 chuang thah an ni tih a thlithlaitu, Shireen.ps chuan a tar lang bawk.
Israel hian indo chhung khan ram dang chanchinbu mite Gaza-a an luh a phalsak lo va, luhtir tura nawrna nasa tak awm mah se a lut theite pawh sipaite kaihhruaina hnuaiah an kal kual thei chauh a ni.