Kum khatah tum hnih board exam awm thei dawn

Class 10 leh 12 board exam kum khata tum hnih exam chu zirlaite tana tihmakmawha siam tum a ni lo va, zirlai ten exam kaihhnawiha stress nasa tak an neih tihhniam nan hmalak mek a ni, tiin Union Education Minister Dharmendra Pradhan chuan a sawi.
Pradhan chuan ‘dummy schools’ tih ang te chu pawng hnawl theih a ni tawh lo tia sawiin ngun taka ngaihtuahhona hun a ni tawh zawk tiin a sawi bawk a.
“Zirlaite chuan class 10 leh 12 board exam chu engineering entrance exam JEE kum khata tum hnih neih angin an duh chuan an hmachhawn thei ang a. An score sang zawk zawk chu an hmagn thei ang a, tihmakmawh ni lovin optional a ni ang” a ti a.
“Zirlaite hian stress sang tak neiin kum hlohah an inngai thin a, an huntha liam angah an ngai thin a. Hei vang hian hun tha tumkhat chauh nei anga an inngaihna avanga stress an neih thinte tihhniam tum a ni,” tiin Pradhan chuan a sawi bawk.
“Zirlaiin a exam hmachhawna titha a intiha a exam hmasakna bera score a neiha a lungawi a nih chuan exam leh a hmachhawn a ngai lovang a. Engmah tihmakmawh a ni lovang” tiin a sawi bawk.
August thlaa Ministry of Education in New Curriculum Framework (NCF) a tihchuahah zirlai tena thataka an tihtheih nan leh an score sang zawk an thlan theih nan board examination chu kum khatah tum hnih neih turin a duang a ni.
Pradhan chuan kum khata board exam tum hnih neih tuma rawtna awm chu zirlai ten tha an ti tiin a sawi bawk a.
“New Curriculum Framework (NCF) puan a nih hnauh zirlaite nena inhmuhna kan nei a. Kan hmalakna te tha an tihthu sawiin an duh thu min hrilh a ni. Kum 2024 atangin exam kumkhatah tum hnih huaihawt tawh kan tum a ni,” tiin a sawi bawk.
Exam kaihhnawih avanga zirlai intihlum tam lutuk chungchangah Minister chuan, “Thil pawi tak mai a ni a. Tute mahin nunna an hloh tur a ni lo, kan fate vek an ni. Zirlai tena stress an neih loh nana hmalak hi kan vaia mawhphurhna a ni,” tiin a sawi bawk.
Nikum khan Rajasthan-a Kota ah zirlai mahni intihlum 23 laiawh an awm a, coaching hub hmunpui niin kumkhata mahni intihlum tam ber kum niin nikum khan 15 mahni intihlum an awm thung.
Pradhan chuan tunah chuan ‘dummy schools’ chungchang te pawh sawihona neih a hun tawh tiin a sawi bawk a. “He issue hi ngaihhai der theih a ni tawh lo. Heng zirlai te hi zirlai pumpui atanga chhut chuan tam an ni lo nachungin he thil kaihhnawih hi ngunthluk taka kan saiwho a ngai tawh a ni” tiin a sawi bawk a. Minister chuan Centre chuan zirlai tena coaching an mamawh tawh loh nan hma a lak mek thu a sawi bawk a.
NEET leh JEE aspirant tam tak te chuan an home state school ah inziak lutin mahse Kota-ah coaching class an kalthin a. Fulltime school anga kal lovin mahse board exam an hmchhawn thin a ni.
Hetianga ‘dummy school’ hi expert tam tak te chuan sawiselin zirlai tena mimala hmasawnna a neih tur te dangchatin thlauhthlaka awmin stress sang tak an nei thin an ti.
Pradhan chuan Central Advisory Board of Education (CABE) meeting kum thum chuang neih a nih tawh loh chungchangah pawh ‘CABE hi siamthat mek a ni’ a ti a. “CABE hlui khan a huamzau lutuk a, tunlaia education system demanf hi a danglam daih a ni. New National Policy hmanga kalphung thar kan hman laiin CABE pawh siamthat a ngai a ni,” a ti bawk a.
Minister chuan IIT pahnih – Delhi leh Madras te chuan ram pwnah offshore cmapus neih tumin hma an lak mek thu leh ram hrang hrangte nena inbiakna neih mek a ni tiin a sawi bawk a.
“Ministry of External Affairs nen inbiakpawha hmalak hoona neih renga ngunthluk taka ngaihtuah mek a ni,” tiin Prdhan chuan a sawi bawk a.
Chutihrual chuan foreign university tena India ram chhunga campus an neih theihna tura hmalakna pawh kalpuia pholan thuai a nih tur thu a sawi bawk a. “Kalphung kan thlak danglam nasa dawn a. Thil fel lo awm thei te kan chingfel zel a, UGC-in hriattirna a chhuah vat ka ring” tiin a sawi bawk.
Karnataka leh West Bengal sorkar tena National Education Policy (NEP) an hman duhloh chungchangah Pradhan chuan, “An duhlohna chhan chu academic thil ni lovin politics thil vang zawk a ni. Eng nge an tum ber hi ka la hrethiam thei lo. West Bengal hian document dang an siam a, kan hmuh dan chuan NEP nen 99% in a inang,” tiin a sawi bawk.