Kum ruk hnuah India-Pakistan inpawhna lei hawng

Kum ruk hnuah India-Pakistan inpawhna lei hawng
India leh Pakistan inthenna, Jammu & Kashmir-a Kaman Bridge chu kum ruk hnua a vawi khat nan thil lungchhiatthlak leh duhawm lo vangin hawn leh a ni.
Bews agency ANI-in a tar lan dan chuan Kashmir-a Baramulla district, Uri sector-a lei hi chawlhkar hnih liam taa Jhelum River-a tla hlum mi pahnih ruang inhlan nan hawn a ni.
March 5 khan Indian Army chuan Basgran leh Kamalkote khuaa nula leh tlangval chu Jhelum River-ah hian an tla tih a puang a. Sipaite hian ruang hi nasa takin an zawng zui bawk.
Tlangval kum 22 mi leh nula kum 19 mi ruang hi Line of Control (LoC) lehlam, Pakistan ram chhungah tui hian a len lut.
Mipa zawk ruang hi India lam, Kaman Bridge bulah hmuh hmasak a ni a; mahse, tui a chak em avangin lak chhuah mai theih a ni lo va, Pakistani lamah tui hian len zelin lak chhuah a ni ta zawk tih thuneituten an sawi.
Mipa ruang hi Pakistan-occupied Kashmir (PoK)-a Chinari bulah lak chhuah a ni a, a hma niin hmeichhia zawk ruang pawh PoK-ah tho lak chhuah a ni tih Indian Express chuan a tar lang.
Ruang lak chhuah ve ve a nih hnuah hian Indian leh Pakistani sipai thuneitute chu indawrin tha taka inhlan ni se an ti a, Kaman Bridge pawh mihring inlainatna zawn atangin kum ruk hnuah hawn leh ni se tiin an inrem a ni.
Ruangte hi Inrinni khan district thuneitute, thi chhung leh ram pahniha sipaite awm laiin inhlan a ni ta a ni.
“Mihring inlainatna thil avangin Indian leh Pakistani sipaite hian ruang hmuh ngei tumin nasa takin an bei a, tha takin an inhlan bawk a ni,” tiin sipaiten thu an chhuah.
Hmeichhe thi ta chhungte zinga mi, Mohammed Rafi-a chuan sipaite chungah an lawm tak zet tih a sawi a, “Ni 15 liam ta khan heng naupangte hi tuiah hian an zuang thla a. NDRF leh Navy team-in nasa taka an zawn hnuah LoC piah lamah a lut a. Vawiin hian an ruang lak chhuah niin kan hnenah hlan a ni ta a, police leh army officer-te chungah kan lawm tak zet a ni,” a ti.
Mipa zawk unaupa (cousin) pawhin sipaite chet lakna avanga an lawmzia a sawi ve bawk.