Kum upat hnua innei ten inthen an awlsam zawk

Kum 30 pelh hnua innei te chu kum 30 tlin hmaa innei te aiin inthen an awlsam zawk niin zirchianna neitu ten an sawi tlat mai. Kum 32 pelh hnu phei chuan kum khat zela nupui/pasal inneih harin inthen lehna chance chu 5%-in kumtin a san belh niin an sawi bawk.
Hei hi a chhan ni thei an sawi pakhatah chuan rilru a lo sakhat tawh vang leh mahni tawka ngaihdan nei thei kan lo nih tawh vang niin an sawi. Kum 30 kan kai hnuah chuan a hmei apain mahni tawka ngaihdan nghet tak nei thei rual kan lo ni tawh a, chu chu nupaa kan insiam hnuah min tibuai thei a lo ni ta thin.
Clinical psychologist Seema Hingorrany chuan, “Chutiang kumah chuan inthen tur tih a awm lo a, eng kumah pawh nupui/pasal nei ila kalsual palh thei a ni, mahse, a hmei a pain kum 30 kan pelh hnuah chuan mahni ngaihdan leh duhdan nghet tak kan lo nei ve tawh a, chu chu sawhsawn harsa kan ti tawh thin a, insiamrem leh harsa kan ti tawh thin,” a ti.
Kum 30 kan pelh chuan eizawnna kawngah pawh kan nih tur ang kan lo zawh tan tawh a, kan rilru leh taksa te pawh a puitling a, chhungte control-na hnuaiah kan awm tawh lem lo va, mahni duh dana khawsa ve thei kan ni tawh a, chuvangin hetiang kum tawha nupui/pasal neih chu inthlakthleng leh harsa kan ti tawh thin a, chu chuan inthen lehna risk a tisang ta a ni.
Ngaihdan tlanglawn tak pakhatah chuan hmeichhia chu kum 20 tawp lam emaw kum 30 tir lam emawa chhungkaw din tur angin kan ngai thin a, hmeichhe tan kum upat hnua nau pai a harsat deuh tawh thin vang niin an sawi a, nau pai hleih theih loh vanga inthen pawh an tam phah niin an sawi.
Gynaecologist Dr Siddarth Manna chuan, “Thi hul hma vang leh naupai lama harsatna dang avangin hmeichhia ten kum 35 hnu lamah chuan naupai an lo harsat phah deuh thei a. Hetiang boruakah hian nupa karah harsatna a awm phah ve thei a ni,” a ti.
Pasal an neih veleh a mipa lam chhungten nau pai nghal deuh mai turin an lo beisei ve thin bawk si a, a nu leh pa ten tu hmel hmuh hlan an nghahhlelh thu an sawi fo chuan a pasal pawhin nupui lakah beisei a lo neih san phah ve lo thei lo va, chutiang karah chuan nupa inkarah harsatna a awm phah thei. Hmeichhe thenkhatin fa neih nghal mai te an lo duh lo va, a mipa lamin neih nghal mai an lo duh ve leh si hian buaina a chawk chhuak thei bawk.
Marriage counsellor Veena Chakravarthy chuan, “Kum upat deuh hnua nupaa insiam hian harsatna tawh tur a tam duh riau a, mahse, kum 30 hnulama innei zawng zawng an inthen leh ngei ngei tihna erawh a ni chuang lo. A pawimawh ber chu inhriatthiam tawnna a ni a, inhriatthiam tawnna kan neih phawt chuan eng kumah pawh innei i la, harsatna tur a awm lo. Kum upat lam aiin engtiangin nge kan nun hman kan tum tih hi a pawimawh zawk chu a ni,” a ti ve thung.